एजेन्सी – इन्डियन प्रिमियर लिग (आइपिएल) २०२१ को २३ औं खेलमा आज चेन्नई सुपर किंग्स र सनराइजर्स हैदराबादबीच प्रतिस्पर्धा हुँदै छ । खेल नेपाली समय अनुसार बेलुका ७ : ४५ मा दिल्लीमा सुरु हुने छ ।

चेन्नई आजको खेलमा पुछारमा रहेको हैदराबादलार्ई हराउँदै शीर्षस्थानमा उक्लिने सोचमा छ । हैदराबाद चेन्नईमाथि जित निकाल्दै पुछारबाट उक्लिन चाहन्छ । महेन्द्रसिंह धोनीको कप्तानीमा रहेको चेन्नई राम्रो लयमा रहँदै पछिल्ला चार खेलमा लगातार जित निकालेको छ । तीव्र गतिका बलर दीपक चाहर, अलराउन्डर रविन्द्र जडेजा र ब्याट्सम्यान फाफ डु प्लेसिस उच्च लयमा छन् ।

चेन्नईले पछिल्लो खेलमा रोयल च्यालेन्जर्स बेंगलोरलाई ६९ रनले पराजित गरेको थियो । जसक्रममा रविन्द्र जडेजाले २८ बलमा ६२ रनको अविजित इनिङ खेल्दा तीन महत्वपूर्ण विकेट लिएका थिए । अन्तिम ओभरमा हर्षल पटेललाई जडेजाले ५ छक्का सहित कुल ३७ रन जोडेका थिए । ब्याटिङ, बलिङ र फिल्डिङ तीनै क्षेत्रमा उत्कृष्ट प्रदर्शन गर्ने जडेजा हैदराबादलाई घातक बन्न सक्छन् ।

फाफ डु प्लेसिस राम्रो लयमा छन् । पछिल्लो दुई खेलमा फाफ डु प्लेसिसले अर्धशतक प्रहार गरेका छन् । कोलकाता नाइट राइडर्ससँग ९५ रनको अविजित इनिङ खेल्दा बेंगलोरविरुद्ध ५० रन जोडेका थिए । डु प्लेसिसको लय रोक्न हैदारबादका बलरलाई कठिन पर्न सक्छ । दीपक चाहरले पावर प्लेमा उच्च प्रदर्शन गर्दै आएका छन् । चाहरले कोलकाता र पन्जाबसँगको खेलमा ४–४ विकेट लिएका थिए । युवा ओपनर ऋतुराज गायकवाड मध्यक्रममा सुरेश रैना, धोनी, जडेजा, साम करन जस्ता खेलाडी हुँदा चेन्नईको ब्याटिङ बलियो छ । बलिङमा दीपक चाहरलाई शार्दूल ठाकुर, साम करन र मध्यगतिका ड्वेन ब्राभोले साथ दिने छन् । स्पिनरमा इमरान ताहिर र जडेजा जस्ता अनुभवी खेलाडी हुने छन् ।

यता हैदराबाद २ अंकका साथ पुछारमा छ । प्लेअफको सम्भावना कायमै राख्न आजको खेलमा जित्नै पर्ने दबाब छ । पछिल्लो खेलमा हैदराबाद दिल्लीसँग सुपर ओभरमा पराजित भएको थियो । जसक्रममा केन विलियम्सनले ६६ रनको अविजित इनिङ खेलेका थिए । जोनी बेयरस्टो पनि राम्रो लयमा देखिएका छन् । तर कप्तान डेविड वार्नरले भने यस सिजनमा संघर्ष गरेका छन् । जसले गर्दा टोलीलाई जितको लागि कठिन बनेको छ ।

हैदराबाद वार्नर आफ्नो लय समाउँदै ठूलो इनिङ चाहन्छ । हैदराबादको मुख्य कमजोरी मध्यक्रम र फिनिसर हो । दिल्लीविरुद्ध डेब्यू खेलमा जगदिश सुचिथले तल्लोक्रममा राम्रो ब्याटिङको साथ हैदराबादलाई राम्रो सम्भावना देखाएका छन् । केदार जाधवको स्थामा मनिष पाण्डे र युवा ब्याट्सम्यान विराट सिंहको स्थानमा अब्दुल सामदलाई मौका दिन सक्छ । लेगस्पिनर राशिद खान हैदराबादका प्रमुख हतियार हुन् । तीव्र गतिको बलिङमा खलिल अहमद, सिद्धार्थ कौल र अभिषेक शर्मा छन् ।

हेड टु हेड :

आइपिएलमा चेन्नई र हैदराबादबीच कुल १४ खेल भएको छ । जसमा चेन्नई १० खेलमा विजयी हुँदा ४ खेलमा पराजित भएको छ । चेन्नईले हैदराबादविरुद्ध बनाएको सर्वाधिक २ सय २३ र कम १ सय ३२ रन छ । हैदराबादले चेन्नईविरुद्ध बनाएको सर्वाधिक रन १ सय ९२ र कम १ सय ३९ रन छ । पछिल्ला पाँच खेलमा चेन्नई तीन खेलमा विजयी हुँदा २ खेलमा पराजित भएको छ । गत वर्ष पहिलो खेलमा हैदराबाद ७ रनले विजयी हुँदा दोस्रो खेलमा २० रनले पराजित भएको थियो ।

अंक तालिका

बेंगलोर ६ खेलमा ५ मा जित र १ मा हार सहित १० अंकका साथ शीर्ष स्थानमा छ। चेन्नई ५ खेलमा ४ मा जित र १ मा हार सहित ८ अंकका दोस्रो शीर्षस्थानमा छ । दिल्ली ६ खेलमा ४ मा जित र २ मा हार सहित ८ अंक भएपनि नेट रनरेटको आधारमा तेस्रो स्थानमा छ । मुम्बई ५ खेलमा ३ मा जित र २ मा हार सहित चौथो स्थानमा छ । कोलकाता ६ खेलमा ४ मा हार र २ मा जित सहित पाँचौ स्थानमा छ । पन्जाब ६ खेलमा ४ मा हार र २ मा जित सहित ४ अंक जोड्दै छैटौं स्थानमा छ । राजस्थान रोयल्स ५ खेलमा ३ मा हार र २ मा जित सहित ४ अंकका साथ सातौं स्थानमा छ । सनराइजर्स हैदराबाद ५ खेलमा ४ मा हार र १ मा जित सहित २ अंक जोड्दै पुछारमा छ ।