एजेन्सी – इन्डियन प्रिमियर लिग (आइपिएल) २०२१ को २२ खेलमा दिल्ली क्यापिटल्सले रोयल च्यालेन्जर्स बेंगलोरविरुद्ध पहिला बलिङ गर्ने भएको छ । अहमदाबादमा दिल्लीका कप्तान ऋषभ पन्तले टस जितेर पहिला बलिङ गर्ने निर्णय लिएका हुन् ।

दिल्लीले स्पिनर रविचन्द्रन आश्विनको स्थानमा तीव्र गतिका बलर ईशान्त शर्मालाई मौका दिएको छ । आश्विनले कोरोना महामारीको कारण परिवारलाई साथ दिने बताउँदै नाम फिर्ता लिएका थिए । बेंगलोरले अष्ट्रेलिया तीव्र गतिका बलर ड्यानियल साम्सलाई आजको खेलमा डेब्यू गराएको छ । साम्सले गतवर्ष दिल्लीबाट आइपिएल खेलेका थिए । डानियल क्रिष्टियनको स्थानमा साम्सलाई मौका दिएको छ । त्यस्तै नवदीप सैनीको स्थानमा रजत पाटिदारलाई मौका दिएको छ । दिल्ली र बेंगलोरबीचको विजेता शीर्षस्थानमा उक्लिने छ ।

दिल्लीको प्लेइङ ११ : पृथ्वी शा, शिखर धवन, ऋषभ पन्त (कप्तान), स्टिभ स्मिथ, शिम्रन हेटमायर, मार्कस स्टोइनिस, अक्षर पटेल, अमित मिश्रा, कागिसो रबाडा, ईशान्त शर्मा र आवेश खान ।

बेंगलोरको प्लेइङ ११ : विराट कोहली (कप्तान), देवदत्त पाडिक्कल, ग्लेन म्याक्सवेल, एवी डिभिलियर्स, वासिन्टन सुन्दर, ड्यानियल साम्स, काइल जामिसन, हर्षल पटेल,रजत पाटिदार, युजभेन्द्र चहल र मोहम्मद शिराज ।

आइपिएल अंक तालिका

चेन्नई ५ खेलमा ४ मा जित र १ मा हार सहित ८ अंकका साथ शीर्षस्थानमा छ । दिल्ली ५ खेलमा ४ मा जित र १ मा हार सहित दोस्रो स्थानमा छ । बेंगलोर ५ खेलमा ४ मा जित र १ मा हार सहित ८ अंक भएपनि नेटरनरेटको आधारको तेस्रो स्थानमा छ । मुम्बई ५ खेलमा ३ मा जित र २ मा हार सहित चौथो स्थानमा छ । कोलकाता ६ खेलमा ४ मा हार र २ मा जित सहित पाँचौ स्थानमा छ । पन्जाब छैटौं, राजस्थान रोयल्स सातौं र सनराइजर्स हैदराबाद पुछारमा छन् ।