भुपेन्द्र जिसी, काठमाडौं

राष्ट्रिय टोलीबाट खेल्नु खेलाडीको सबैभन्दा ठूलो सपना हो । देशको जर्सी लगाएर एक साथ मैदान उत्रने अवसर सहोदर दाजुभाइले बिरलै पाउँछन् । शनिबारबाट सुरु हुने नेदरल्यान्ड्स र मलेसियासँगको त्रिकोणात्मक टि२० आई सिरिजमा नेपाली टोलीमा आरिफ शेख र आसिफ शेख दाजुभाइले स्थान बनाएका छन् ।

शेख दाजुभाई सन् २०१७ मा बंगलादेशमा भएको एसिसी इमर्जिङ टिम्स एसिया कपमा पहिलो पटक परेका थिए । आरिफले २०१४ र आसिफले २०१७ मा नेपाली टोलीमा डेब्यू गरेका थिए । आरिफ लगातार नेपाली टोलीबाट खेलि रहँदा आसिफ भने त्यसपछि टोलीमा परेनन् । गत माघमा काठमाडौंमा भएको प्रधानमन्त्री पुरुष राष्ट्रिय एक दिवसिय क्रिकेट प्रतियोगिता र काठमाडौं मेयर कपमा नेपाल एपिएफ क्लबबाट उच्च प्रदर्शन गरेपछि आसिफले पूनरागमन गरेका हुन् ।

‘पिएम र मेयर कप राम्रो भयो । मेरो काम राम्रो क्रिकेट खेल्ने हो । प्रशिक्षक डेभ ह्वाटमोर आएपछि नयाँ नयाँ कुरा सिक्न पाई राखेको छु । वहाँले मैदानभित्र मात्र नभएर बाहिर पनि सिकाउनु भएको छ । क्रिजमा जमिसकेपछि विकेट नगुमाउने बताउनुभएको छ’, आसिफले भने ।

आसिफ सुरुवात राम्रो गरेपनि अर्धशतक वरपर पुगेपछि भने विकेट गुमाउँदै आएका छन् । ‘अर्धशतक पछि आउट हुने कमजोरी सुधार गर्न चाहन्छु । क्रिकेटमा एक पटक प्रदर्शन गरेर हुँदैन । निरन्तर हुनुपर्छ । पहिला निरन्तर थिएन । धेरै मिहिनेत गरेपछि अहिले निरन्तर भइरहेको छ । त्यसको नतिजा पनि देखिन थालेको छ’, आसिफले भने ।

‘मेरो आफ्नै छुट्टै खेल छ । जहिले पनि सकरात्मक सोच राख्छु । मेरो रेन्ज (क्षेत्र) मा आएको बल मिस गर्दिन । आफ्नो खेल्ने शैली भने टोली कस्तो अवस्थामा छ त्यसले पनि निर्भर गर्छ,’ उनले थपे ।

आसिफले सन् २०१६ को एभरेष्ट प्रिमियर लिग (इपिएल) को फाइनलमा शतक प्रहार गरेपछिको चर्चा निकै बढेको थियो । २०१६ देखि २०१९ सम्म यू१९ प्रतियोगिता खेलेका आसिफको प्रदर्शनमा भने उतारचढाव आइरहयो । पछिल्ला प्रतियोगितामा आसिफ आक्रमक रुपमा प्रस्तुत हुँदै आएका छन् ।

पहिला पनि खेल्ने शैली त्यहि नै भएपनि प्रदर्शन नदेखिएको उनी बताउँछन् । ‘पछिल्लो समय योजना अनुसार नै प्रदर्शन भएको छ । सट छनोट पनि भने अनुसार सफल भएको छु । उमेर समूहमा क्रिकेट खेल्न पाउँदा अहिले करिअरमा ठूलो सहयोग पुगेको छ । राम्रो खेलाडी आउने नै यू१९ बाट हो । टेष्ट राष्ट्र टोलीविरुद्ध खेलेर आएपछि आत्माविश्वास पनि फरक हुन्छ’, उनले भने ।

आसिफको बाल्यकाल

वीरगञ्जको मुरली चोकमा बाबा मोहम्मद सलाम शेख र आमा सम्मा प्रविनको कोखबाट २०५८ सालमा भएको हो । आरिफ उनको जेठा दाई हुन् । दुई दिदी बहिनी छन् । बाल्यकालमा आसिफ र आरिफ खाली भएको समयमा घरको छतमा क्रिकेट खेल्ने गर्दर्थे । आसिफले दाईबाट नै प्रभावित हुँदै क्रिकेट सिकेर हुर्के।

‘हामी घरको छतमा जहिल्यै क्रिकेट खेल्थ्यौं । खेल्दाखेल्दै बल वरपरको घरमा पस्थ्यो । त्यो बेलामा धेरै गाली खान्थ्यौं । धेरै पटक झगडा पनि भएको छ । त्यसपछि स्कुल क्रिकेट खेल्न थाल्यौं । स्कुलमा क्रिकेट खेल्न थालेपछि हामीले छात्रवृत्ति नै पायौं । विद्यासदन माध्यमिक विद्यालयमा पढेका थियौं’, आसिफले पुराना अनुभव सुनाए ।

‘मैले दाईलाई बलिङ गर्थें । बल फाल्थे । तर दाई मेरो पालो आएपछि दाइले छोडेर जाँदा मलाई रिस उठ्थ्यो । यसै कुरामा दाजुभाईबीच झगडा पनि पर्दथ्यो । बल अर्कोको घरमा गई सकेपछि त्यो लिन दाईले जहिल्यै दाईले मलाई पठाउनुहुन्थयो’, दाजु आरिफसँगको बाल्यकाल सम्झदै उनले भने ।

‘कक्षामा हामी जुनियर सिनियर थियौं । म त्यति बेला २-३ मा पढ्थें । दाईले आफ्नो खेल हुँदा मलाई बोलाएर लैजानुहुन्थ्यो । फिल्डर पुगेन भने मलाई खेलाउनु हुन्थ्यो । दाई जहाँ गएपनि मलाई लगेर जानुहुन्थयो । दाईसँग हिँड्दा, बल फाल्दा, फिल्डिङ गर्दा दाईको खेल हेर्दाहेदै मैले पनि सिके । यसरी नै खेल्दै गएपछि स्कुल स्तरमा आफ्नो खेल पन्नी राम्रो हुँदै गयो । त्यसपछि खेल्न सकिन्छ भन्ने विश्वास बढ्यो,’ आसिफले थपे ।

दुवैले खेल्ने निर्णय लिएपनि घरको आर्थिक अवस्था भने त्यति राम्रो थिएन । ‘बुबा वर्कशपमा काम गर्नुहुन्छ । तर क्रिकेट भनेपछि हुरुक्कै हुने । बुबाले हामीलाई जसरी त्यसरी पढाउनु भयो । चाहिँने ब्याट, बल सामग्री किन्दिनु भयो । कतै खेल खेल्न जानु पर्यो भने लिन आउनुहुन्थ्यो । हाम्रो खेल हेर्न कामनै छोडेर हेर्न आउनुहुथ्यो । हामी यो स्तरमा आउँदा बुबाहो हात निकै ठूलो छ,’ उनले भने ।

आसिफको क्रिकेट यात्रा

आसिफले नेपाली यू१६ टोलीदेखि नै नेपालको प्रतिनिधित्व गर्दै आएका छन् । २०१२ मा वीरगञ्ज जिल्ला छनोट राम्रो गर्दै नेपालको यू१६ टोलीबाट प्रतिनिधित्व गरेका थिए । मलेसियामा भएको यू१६ इलिट कप २०१२ को फाइनलमा नेपाल मलेसियासँग नेपाल १ विकेटले पराजित हुन पुगेको थियो । जुन नेपालले मलेसियासँग उमेर समूहमा हारेको पहिलो हार थियो । आसिफ उक्त फाइनलमा ७ रनमा आउट भएका थिए ।

आसिफ २०१४ मा मलेसियामानै भएको यू१६ प्रिमियर लिग प्रतियोगिता खेले । नेपाल शीर्ष स्थानमा रहँदै च्याम्पियन बन्दा आसिफ उपकप्तान थिए । प्रदर्शन भने औसत थियो । त्यो बेला नेपालको कप्तानी सुमित महर्जनले गरेका थिए ।

फ्रेन्चाइज लिगमा शतक

आसिफले २०१६ मा नेपालमा पहिलो पटक भएको फ्रेन्चाइज टि२० लिग इपिएलमा पञ्चकन्या तेजबाट खेल्दै कलिलो उमेरमै राम्रो प्रभाव छाडेका थिए । आसिफले फाइनलमा ज्ञानेन्द्र मल्ल कप्तान रहेको कलर्स एक्सफ्याक्टर्सविरुद्ध ६४ बलमा ७ चौका र ८ छक्का सहित १ सय ११ रनको शतकीय अविजित इनिङ खेलेपछि पञ्चकन्या च्याम्पियन बनेको थियो ।

आसिफले आफ्नो दाई आरिफसँग चौथो विकेटका लागि ४७ रनको साझेदारी गरेका थिए । आसिफ उक्त प्रतियोगितामा ६ खेलमा २ सय २० रनका साथ शीर्ष स्थानमा थिए । उक्त उच्च प्रदर्शन पछि आसिफ पहिलो पटक यू१९ टोलीमा पर्दै एसिया कप खेल्न श्रीलंका गएका थिए ।

आसिफले श्रीलंकाविरुद्ध डेब्यू गर्दा १ रनमा आउट हुन पुगे । दोस्रो खेलमा भारतविरुद्ध १८ र मलेसियाविरुद्ध १ रनमै आउन हुन पुगे । त्यसपछि धनगढी प्रिमियर लिग (डिपिएल) मा आसिफलाई शरद भेषावकर कप्तान रहेको विराटनगर किंग्सलेनै टोलीमा अनुबन्ध गरेको थियो । आरिफ पारस खड्का कप्तान रहेको धनगढी टिम चौराहबाट खेले । आसिफले लगातार यू१९ क्रिकेट खेल्दै गए । विश्वकप छनोट, एसिया कप, एसिसीका प्रतियोगिता, यू१९ भ्रमणमा आसिफ पहिलो रोजाईमा खेलि रहे ।

पोखरा प्रिमियर लिगमा आसिफलाई शरदको कप्तानीमा रहेको पोखरा पल्टनले अनुबन्ध गर्यो । आरिफ पारसको चितवन राइनोजबाट खेले । आसिफले २०१८ मा भारतको लखनउमा नेपाल, भारत र अफगानिस्तानबीच भएको यू१९ टोलीमा कप्तानी गरेका थिए । २०१८ मा एसिया कपमा पनि आसिफलेनै कप्तानी गरेका थिए । अन्तिम पटक २०१९ मा श्रीलंकमा भएको यू१९ एसिया कप खेलेका थिए । आरिफ दाजु भाई समग्र फ्रेन्चाइज लिगमा बढी विपक्ष्यका रुपमा खेलेका छन् ।

आसिफको सिनियर डेब्यू

आसिफले सन् २०१७ मा बंगलादेशमा भएको एसिसी इमर्जिङ टिम्स एसिया कपमा हङकङविरुद्ध डेब्यू गरेका थिए । आसिफ डेब्यू खेलमा १२ रनमा आउट भएका थिए । त्यसपछि निरन्तर यू१९, राष्ट्रिय प्रतियोगिता र फ्रेन्चाइज लिग खेल्दै आसिफले सिनियर टोलीमा आफ्नो दावेदारी प्रस्तुत गरिरहे ।

आसिफ टि२० आई टोलीमा भने पहिलो पटक परेका हुन् । उनी एपिएफसँग जोडिएको पाँच वर्ष भइसकेको छ । एपिएफमा आसिफले यसै महिना स्थायी रुपमै नाम निकालेका छन् । फ्रेन्चाइज लिग बाहेक अन्य सबै आसिफले एपिएफ र आरिफले नेपाल पुलिस क्लबबाट घरेलु क्रिकेट खेल्छन् ।

आरिफको प्रेरणा, माया र साथ

‘दाईसँग खेलमा राम्रो भएपनि नभए पनि कुरा गरिरहेको हुन्छु । दाईले राम्रो प्रदर्शन नहुँदा भेटेर सम्झाउनु हुन्छ । राम्रो प्रर्दशन नभएपछि मलाई केहि समय चाहिन्छ । म केहि समय एक्लै बस्छु । वहाँलाई पनि त्यो कुरा थाहा छ । गल्ती भयो भने सम्झाउनु हुन्छ’,आसिफले बताए ।

‘कडा मिहिनेत गरिरहेको थिएँ । मेरो समय आउँछ भन्ने सकरात्मक सोचले आफूलाई फिट राखें । दाईले आफूले संघर्ष गर्नुभयो । तर मलाई कहिल्यै पनि कुनै कुरा कमी हुन दिनु भएन । वहाँलेनै सामाग्री सबै जहाँबाट भएपनि मलाई ल्याइदिनुहुन्थ्यो । आफ्नो खर्च काटेरै भएपनि मलाई पैसा र चाहिने सामग्री दिनुहुन्थ्यो’, उनले भने ।

आसिफ दाईसँग खेल्दा त्यतिनै मज्जा आउने बताउँछन् । ‘साँच्चै भन्ने हो भने मलाई आरिफ दाईसँग खेल्न एकदमै मज्जा आउँछ । सँगै देशका लागि खेल्दाको क्षणको अनुभव गर्दा नै निकै आनन्द आउँछ । नेपालको लागि सँगै खेल्यौं भने पनि त्यो निकै विशेष हुनेछ । आरिफ दाईले मलाई र मैले आरिफ दाईलाई बुझ्दा खेल्न पनि निकै सहज हुन्छ’, उनले भने ।

आसिफको सपना नेपाललाई टेष्ट राष्ट्र बनाउने ठूलो रहर छ । आसिफ पाएको मौकालाई सदुपयाग गर्ने सोच बाहेक अन्य केहि पनि सोचेका छैनन् । नेपालमा शरद भेषावकर र भारतीय ओपनर लोकेश राहुल उनका आदर्श खेलाडी हुन् ।

आसिफले घरेलु र फ्रेन्चाइज लिग निरन्तर शरदको कप्तानीमा खेल्दै आएका छन् । नेपाली घरेलु क्रिकेटमा एक सफल कप्तान तथा ब्याट्सम्यान शरदको कप्तानीमा खेल्दा छुट्टै स्वतन्त्र र मज्जा आउने आसिफ बताउँछन् । ‘मलाई यो स्तरमा ल्याउनेनै शरद दाईले हो । मलाई त्यो इपिएलमा नल्याएको भए सायद कसैले चिन्दन थियो होला । वहाँको कप्तानीमा खेल्दा आनन्द र मज्जा छुट्टै हुन्छ, उनले भने ।

ओपनिङ नेपाली क्रिकेटको सबैभन्दा अस्थिर भूमिका हो । टोलीमा स्थान बनाउन भन्दा टिक्न धेरै कठिन छ । पछिल्लो समय एकपछि अर्को प्रतियोगितामा ओपनर परिवर्तन हुँदै आएको छन् । नेपाल स्थायी ओपनरको खोजीमा छ । आसिफ त्यसको दीर्घकालीन समाधान बन्ने लक्ष्यसहित अघि बढेका छन् ।

आसिफलाई घरेलु मैदानमा उच्च प्रदर्शनका साथ लामो यात्रा गर्ने एउटा राम्रो अवसर छ । घरेलु मैदानबारे राम्रोसँग जानकार हुँदा पनि आसिफलाई केहि फाइदा छ । नेपाली क्रिकेटमा विकेटकिपर र ओपनर दुवै भूमिकामा राम्रो सम्भावना देखाएका आसिफबाट घरेलु क्रिकेटमा जस्तै राष्ट्रिय टोलीमा पनि सोहि प्रदर्शनको अपेक्षा गरिएको छ ।