एजेन्सी – राजस्थान रोयल्सका प्रमुख हतियार तथा इंग्ल्यान्डका स्टार अलराउन्डर बेन स्टोक्सले इन्डियन प्रिमियर लिग (आइपिएल) २०२१ का बाँकी सबै खेल गुमाउने भएका छन् ।

पहिलो खेलमा पन्जाब किंग्सविरुद्ध खेल्ने क्रममा घाइते भएका स्टोक्सले बाँकी खेल गुमाउने भएपछि राजस्थानलाई ठूलो धक्का लागेको छ ।पहिलो खेलमा स्टोक्सको दायाँ हातको माइली औंला भाचिँएपछि स्टोक्सले बाँकी खेल गुमाउने भएका हुन् । स्पिनर रियान परागको बलमा क्रिस गेल बेन स्टोक्सबाट दशौं ओभरको पाँचौं बलमा क्याच आउट भएका थिए । स्टोक्सले उक्त क्याच लिनेक्रममा चोट लाग्न पुगेको थियो ।

स्टोक्स पहिलो खेलमा ओपनिङ गर्दै शून्यमा क्याच आउट भएका थिए । राजस्थानका ओपनर स्टोक्स ब्याटिङसँगै तीव्र गतिको बलिङमा भरपर्दा खेलाडी थिए । स्टोक्स आफ्नो उत्कृष्ट प्रदर्शनमा एक्लै सहज जिताउन सक्ने क्षमता भएका खेलाडी हुन् । इंग्ल्यान्डका तीव्र गतिका बलर जोफ्रा आर्चरले पनि सुरुवाती आइपिएलमा उपलब्ध हुन सक्ने छैनन् ।

स्टोक्सको अनुपस्थितमा राजस्थानले लियाम लिभिङस्टोनलाई ओपनिङ गराउन सक्छ । डेविड मिलर पनि विकल्पमा रहने छन् । स्टोक्सले गत सिजनमा बुबा बिरामीको कारण सुरुवाती ६ खेल गुमाएका थिए । ६ खेल पछि उपलब्ध स्टोक्सले उत्कृष्ट प्रदर्शन गरेपनि लिग चरणबाटै राजस्थान बाहिरिनु परेको थियो ।