एजेन्सी – इन्डियन प्रिमियर लिग (आइपिएल) २०२१ को पाँचौं खेलमा मुम्बई इन्डियन्सविरुद्ध कोलकाता नाइट राइडर्सले पहिला फिल्डिङ गर्ने भएको छ ।

चेन्नईमा सम्पन्न टसमा कोलकाता कप्तान ओईन मोर्गनले जितेर पहिला बलिङ गर्ने निर्णय लिएका छन् । मोर्गनले आजको खेलमा टोलीमा कुनै परिवर्तन नगरेको जनाएका छन् । मुम्बईले टोलीमा एक परिवर्तन गरेको छ । ओपनर तथा विकेटकिपर क्विन्टन डी कक टोलीमा फर्किएका छन् । क्रिस लिनको स्थानमा डि ककलाई मुम्बईले मैदान उतारेको छ । पहिलो खेलमा बेंगलोरविरुद्ध लिनले ४९ रन जोडेका थिए । पहिलो खेलमा डि कक क्वारेन्टाइनको कारण टोलीमा उपलब्ध नहुँदा लिनले मौका पाएका थिए ।

पहिलो खेलमा कोलकाता नाइट राइडर्सले सनराइजर्स हैदराबादलाई १० रनले पराजित गरेको थियो । मुम्बई पहिलो खेलमा रोयल च्यालेन्जर्स बेंगलोरसँग २ विकेटले पराजित भएको थियो ।

कोलकाता प्लेइङ ११ : सुभमन गिल, नितिश राना, राहुल त्रिपाठी, आन्द्रे रसेल, ओईन मोर्गन (कप्तान), दिनेश कात्तिक, सकिब अल हसन, प्याट कमिन्स, प्रसिद्ध कृष्णा, हरभजन सिंह र बरुण चक्रबर्ती

मुम्बईको प्लेइङ ११ : रोहित शर्मा (कप्तान), क्विन्टन डी कक, सूर्यकुमार यादव, ईशान किशन, हार्दिक पान्ड्या, काइरन पोलार्ड, क्रुनाल पान्ड्या, मार्को जानसेन, राहुल चहर, ट्रेन्ट बोल्ट र जस्प्रित बुमराह ।