एजेन्सी – कप्तान सञ्जु स्यामसनको कीर्तिमानी शतकका बाबजुद पन्जाब किंग्सले इन्डियन प्रिमियर लिग (आइपिएल) २०२१ मा रोमाञ्चक जित हात पारेको छ । पञ्जाबले राजस्थानलाई ४ रनले हराउँदै रोमाञ्चक विजयी सुरवात गरेको हो ।

जितको लागि २ सय २२ रनको विजयी लक्ष्य पछ्याएको राजस्थानले २० ओभरमा ७ विकेट गुमाउँदै २ सय १७ रन बनायो । राजस्थानका कप्तान सञ्जु स्यामसनले ६३ बलमा १२ चौका र ७ छक्का सहित सर्वाधिक १ सय १९ रनको उत्कृष्ट शतकीय कीर्तिमानी इनिङ खेलेपनि टोलीको हार टार्न सकेनन् । स्यामसनले ५४ बलमा शतक प्रहार गरेका थिए । आइपिएल इतिहासमा डेब्यू कप्तानीमा शतक प्रहार गर्ने स्यामसन पहिलो ब्याट्सम्यान बनेका छन् । स्यामसनले १८ औं ओभरको तेस्रो बलमा झेय रिचर्डसनलाई चौका प्रहार गर्दै शतक पूरा गरेका थिए । त्यसअघि स्यामसनले दुई जीवनदान पाएका थिए । ब्यक्तिगत १२ र ३५ रनमा क्याच ड्रप हुँदा जीवनदान पाएका थिए ।

राजस्थानलाई अन्तिम ओभरमा जितको लागि १३ रन आवश्यक परेको थियो । तीव्र गतिका बलर अर्शदीप सिंहले पहिलो बल स्यामसनलाई डट राखे । दोस्रो बलमा स्यामसनले एक रन बटुले । तेस्रो बलमा पनि अर्शदीपले एक रन दिए । चौथो बलमा स्यामसनले छक्का प्रहार गरे । तर पाँचौ बल डट राखेपछि खेल रोमान्चक बनेको थियो । अन्तिम बलमा स्यामसनले ठूलो सट प्रहार गरेपनि दीपक हुडाबाट क्याच आउट भएपछि पन्जाब विजयी भएको थियो ।

पहिलो ओभरको तेस्रो बलमा ठूलो सट खेल्नेक्रममा टप एज लागेर बेन स्टोक्स मोहम्मद शामीबाट शून्यमा कट एण्ड बोल्ड आउट भएका थिए । अर्शदीप सिंहले चौथो ओभरको दोस्रो बलमा मनान बोहरालाई १२ रनमा कट एण्ड बोल्ड आउट गर्दै पन्जाबलाई राम्रो सुरुवात दिलाएका थिए । आठौं ओभरको तेस्रो बलमा झेय रिचर्डसनले योर्करमा जस बटलरलाई २५ रनमा बोल्ड आउट गरेपछि राजस्थान सुरुवाती समय दबाबमा परेको थियो । बटलरले १३ बलमा ५ चौका प्रहार गरे । त्यसअघि बटलरले तीव्र गतिका बलर राइली मेरिडिथलाई पाँचौं ओभरमा लगातार चार चौका प्रहार गरेका थिए ।

त्यसपछि शिवम दुबेले १५ बलमा ३ चौका सहित २३ रनमा क्याच आउट भए । राम्रो प्रदर्शन गरेका युवा ब्याट्सम्यान रियान परागलाई मोहम्मद शामीले १७ औं ओभरको दोस्रो बलमा बाउन्सर गरेपछि टप एज लागेर विकेटकिपर लोकेश राहुलबाट २५ रनमा समातिन पुगेका थिए । परागले ११ बलमा ३ छक्का र १ चौका प्रहार गरे ।

पन्जाबका मोहम्मद शामीले ४ ओभरमा ३३ रन खर्चेर २ विकेट लिए । अर्शदीप सिंहले ४ ओभरमा ३५ रन खर्चेर ३ विकेट लिए । राइली मेरिडिथ र झेय रिचर्डसनको नाममा १–१ विकेट लिए ।

त्यसअघि वानखडे स्टेडियम मुम्बईमा टस हारेर ब्याटिङ थालेको पन्जाबले निर्धारित २० ओभरमा ६ विकेट गुमाउँदै २ सय २१ रन बनाएको थियो । पन्जाबका कप्तान लोकेश राहुलले ५० बलमा ७ चौका र ५ छक्का सहित ९१ रनको उत्कृष्ट इनिङ खेले । दीपक हुडाले २८ बलमा ४ चौका र ६ छक्का सहित ६४ रनको विष्फोटक इनिङ खेले ।

तेस्रो ओभरको चौथो बलमा तीव्र गतिका बलर चेतन सकारिया मयंक अग्रवाललाई १४ रनमा विकेटकिपर सञ्जु स्यामसनबाट क्याच गराउँदै पहिलो सफलता दिलाएका थिए । दोस्रो विकेटका लागि राहुल र क्रिस गेलले ४५ बलमा ६७ रनको साझेदारी गरेका थिए । दशौं ओभरको पाँचौं बलमा रियान परागले बेन स्टोक्सबाट गेललाई ४० रनमा क्याच आउट गराएका थिए । गेलले २८ बलमा ४ चौका र २ छक्का प्रहार गरे । त्यसपछि राहुल र दीपकले रनको वर्षा गराएका थिए ।

तेस्रो विकेटका लागि दीपक र राहुलले ४५ बलमा १ सय ५ रनको विष्फोटक शतकीय साझेदारी गरेपछि पन्जाबले विशाल योगफल बनाउन सफल भएको हो । १८ औं ओभरको अन्तिम बलमा चेतनले फाइनल लेगमा उत्कृष्ट क्याच गरेपछि निकोलस पुरन शून्यमा आउट भएका थिए ।

क्रिस मोरिसले ४ ओभरमा ४१ रन खर्चेर २ विकेट लिए । डेब्यू खेल खेलेका तीव्र गतिका देबे हाते बलर चेतन सकारियाले ४ ओभरमा ३१ रन खर्चेर ३ विकेट लिए । रियान परागले १ विकेट लिए ।

राजस्थानले आफ्नो दोस्रो खेल बिहिबार दिल्ली क्यापिटल्ससँग खेल्ने छ । पन्जाबले शुक्रबार चेन्नई सुपर किंग्ससँग प्रतिस्पर्धा गर्ने छ ।