एजेन्सी – घरेलु टोली दक्षिण अफ्रिकाले पाकिस्तानविरुद्ध दोस्रो टि२० आई खेलमा ६ विकेटको सहज जित निकालेको छ । योसँगै चार टि२० आई खेलको सिरिज १–१ को बराबरीमा पुगेको छ ।

जितको लागि १ सय ४१ रनको विजयी लक्ष्य पछ्याएको दक्षिण अफ्रिकाले १४ ओभरमै ४ विकेटको क्षतिमा पूरा गर्यो । दक्षिण अफ्रिका ओपनर एडेन माक्ररमले ३० बलमा ७ चौका र ३ छक्का सहित सर्वाधिक ५४ रनको योगदान दिए । कप्तान हेनरिक क्लासेन २१ बलमा ४ चौका र १ छक्का सहित ३६ रनमा अविजित रहे । ओपनर जानेमान मलान १५ र जर्ज लिन्डेले २० रनको योगदान दिए ।, पाकिस्तानका उस्मान कादिरले २, हसन अली र मोहम्मद हसनैनले १–१ विकेट लिए ।

त्यसअघि टस जितेर पहिला ब्याटिङ थालेको पाकिस्तानले निर्धारित २० ओभरमा ९ विकेट गुमाउँदै १ सय ४० रन बनाएको थियो । कप्तान बाबर आजमले ५० बलमा ५ चौका सहित ५० रन बनाए । बाबरले ४९ बलमा अर्धशतक पूरा गरेका थिए । जुन बाबरको टि२० आई करिअरकै सुस्त (ढिलों) अर्धशतक पर्दछ । पाकिस्तान क्रिकेट टि२० आई इतिहासको दोस्रो सुस्त अर्धशतक हो । यसअघि सोयब खानले सन् २००८ मा जिम्बावेविरुद्ध ५३ बलमा अर्धशतक पूरा गरेका थिए ।

मोहम्मद हफिज ३२, हैदर अली र हसन अलीले १२–१२ रन बनाए । अन्यले दोहोरो अंकमा रन बनाउन सकेनन् । दक्षिण अफ्रिका जर्ज लिन्डेले ४ ओभरमा २३ रन खर्चेर ३ विकेट लिए । लिजाड विलियम्सले ४ ओभरमा ३५ रन खर्चेर ३ विकेट लिए ।

पहिलो खेलमा पाकिस्तान ४ विकेटले विजयी भएको थियो । तेस्रो खेल बुधबार हुने छ ।