एजेन्सी – श्रीलंका र वेस्टइन्डिजबीचको पहिलो टेष्ट खेल बराबरीमा सकिएको छ । जितको लागि ३ सय ७५ रनको विजयी लक्ष्य पछ्याएको वेस्टइन्डिज दोस्रो इनिङमा ४ विकेट गुमाउँदै २ सय ३६ रन बनाउँदा पाँचौ दिनको खेल सकिएसँगै खेल बराबरीमा सकिएको थियो ।

वेस्टइन्डिजका नक्रुमाह बोनर २ सय ७४ बलमा १३ चौका र १ छक्का सहित १ सय १३ रनमा अविजित रहे । उनको यो टेष्ट करिअरको पहिलो शतक हो । काईल मेयर्स ५२, क्रेग ब्रेथवेट २३ रनमा आउट हुँदा जेसन होल्डर १८ रनमा अविजित रहे । श्रीलंका विश्व फर्नांन्डो र लासिथ एम्बुल्डेनिया २–२ विकेट लिए ।

पहिलो इनिङमा १ सय २ रनले पछि परेको श्रीलंकाले दोस्रो इनिङमा उत्कृष्ट ब्याटिङका साथ ४ सय ७६ रनमा अल आउट भएको थियो । श्रीलंका पाथुम निसान्काले डेब्यू खेलमा २ सय ५२ बलमा ६ चौका सहित १ सय ३ रनको शतकीय इनिङ खेलेका थिए । त्यस्तै निरोशन डिक्वेला १ सय ६३ बलमा ८ चौका सहित ९६ रनमा आउट भए ।

शीर्षक्रमका ओशादा फर्नान्डो १ सय ४९ बलमा ११ चौका सहित ९१ रनमा आउट भए । लाहिरु थिरिमाने ७६ र धनन्जय डी शिल्भा ५० रनमा आउट भए । वेस्टइन्डिजका रहकिम कर्नवाल र केमार रोचले ३–३ विकेट लिए । काईल मेयर्सको नाममा २ विकेट रह्यो ।

पहिलो इनिङमा वेस्टइन्डिज २ सय ७१ रनमा अल आउट भएको थियो । रहकिम कर्नवालले सर्वाधिक ६१ रनको योगदान दिए । जोशुवा डि शिल्भा ४६, काईल मेयर्स ४५ र जोन क्याम्पवेल ४२ रनमा आउट भए । श्रीलंका सुरगां लकमले सर्वाधिक ५ विकेट लिए । श्रीलंका पहिलो इनिङमा १ सय ६९ रनमा अल आउट भएको थियो ।

श्रीलंका ओपनर लाहिरु थिरिमानेले ७० र निरोशन डिक्वेलाले ३२ रन बनाउन बाहेक अन्यले राम्रो प्रदर्शन गर्न सकेनन् । वेस्टइन्डिजका जेसन होल्डरले ५ र केमार रोचले ३ विकेट लिए । दुई टेष्ट सिरिजको दोस्रो खेल सोमबारबाट सुरु हुने छ ।