काठमाडौं (हाम्रो खेलकुद) – आक्रामक ब्याट्सम्यान सिद्धान्त लोहनीले सप्तरी प्रिमियर लिगमा बोदे बर्साईन थन्डर्सबाट तिलाठी कोईलाडीविरुद्ध उत्कृष्ट शतक प्रहार गरेका छन् ।

सप्तरीमा टस जितेर पहिला ब्याटिङ थालेको बोदेले निर्धारित २० ओभरमा ८ विकेट गुमाउँदै १ सय ८५ रन बनाएको थियो । बोदेका कप्तान समेत रहेका सिद्धान्त लोहनी ४९ बलमा १२ चौका र ६ छक्का सहित १ सय रनमा अविजित रहे । अभिनाश कर्ण १०, राहुल मण्डल १७, योगेन्द्रसिंह कार्की १५, नारायण जोशी १९ र विशाल शुश्लिङ १४ रनमा आउट भए । तिलाठीका आदिल अन्सारी, चित्र बहादुर विष्टले २-२ विकेट लिए । दीपेन्द्रसिंह ऐरी र राशिद खानले १-१ विकेट लिए । तिलाठीको कप्तानी दीपेन्द्रले गरेका छन् ।

यसअघि बुधबार युवा विकेटकिपर अनिल कुमार शाहले बजाज खडक वारियर्सबाट रुपनी राईडर्सविरुद्ध ६४ बलमा १२ चौका र ७ छक्का सहित १ सय १३ रनको शतकीय इनिङ खेलेका थिए । मंगलबार अनिलले बोदे बर्साईन् थन्डर्सविरुद्ध अनिलले ५० बलमा ७ चौका र ८ छक्का सहित १ सय रनमा अविजित थिए ।

बुधबार सम्म समान तिन खेलमा दुई जित र एक हार बेहोरेका बजाज खडक वारियर्स, रुपनी राईडर्स र तिलाठी कोईलाडी क्रमशः पहिलो, दोश्रो र तेश्रो स्थानमा रहेका छन् । एक जित हात पारेको टिभीएस किंग्स चौथो र जितविहिन बोदे बर्साईन थन्डर्स पाँचौ स्थानमा छ ।