एजेन्सी – भारतीय क्रिकेट टोलीका मध्यक्रमका युवा ब्याट्सम्यान श्रेयस ऐरले इंग्ल्यान्डविरुद्ध बाँकी दुई खेल गुमाउने भएका छन् । मंगलबार इंल्यान्डविरुद्ध पहिलो खेलमा फिल्डिङको क्रममा ऐरको बायाँ हातको काँधमा चोट लागेको थियो ।

तीव्र गतिका बलर शार्दूल ठाकुरको आठौं ओभरको चौथो बलमा जोनी बेयरस्टोले प्रहार गरेको शट कभरमा रोक्ने क्रममा डाइभ मार्नेक्रममा ऐरको बायाँ काँधमा चोट लागेको थियो । श्रेयस ऐरले अप्रिल ९ देखि सुरु हुने इन्डियन प्रिमियर लिग (आइपिएल) को सुरुवाती खेल गुमाउने उच्च सम्भावना छ । इंग्ल्यान्डसँगको तीन ओडिआई सिरिज अन्तर्गत दोस्रो खेल शुक्रबार र तेस्रो खेल आइतबार हुने छ ।

ऐरको स्थान बाँकी दुई खेलमा सूर्य कुमार यादवले लिने सम्भावना देखिन्छ । मुम्बई इन्डियन्सबाट आइपिएल खेल्ने सूर्यले इंग्ल्यान्डसँग पाँच टि२० आई सिरिज अन्तर्गत चौथो खेलमा डेब्यू गर्दै उत्कृष्ट अर्धशतक प्रहार गरेका थिए । आक्रामक ब्याट्सम्यान सूर्य ओडिआई डेब्यूको प्रतीक्षामा छन् । घरेलु क्रिकेट ऐर र सूर्यले मुम्बईबाट खेल्ने गर्दछन् ।

दिल्लीका कप्तान ऐरले सुरुवाती आइपिएल गुमाएमा ठूलो झट्का लाग्ने छ । ऐर उपलब्ध नभए विकेटकिपर तथा उपकप्तान ऋषभ पन्तले कप्तानी गर्न सक्ने सक्छन् । स्टिभ स्मिथ, अजिंक्या रहाने, शिखर धवन र रविचन्द्रन आश्विन पनि कप्तानको विकल्पमा छन् । आइपिएलमा दिल्लीले पहिलो खेल अप्रिल १० मा चेन्नई सुपर किंग्ससँग खेल्दै सुरुवात गर्ने छ ।