एजेन्सी – कप्तान विराट कोहलीको उत्कृष्ट ब्याटिङको सहयोगमा भारतले तेस्रो टि२० आई खेलमा इंग्ल्यान्डलाई १ सय ५७ रनको मध्यम लक्ष्य दिएको छ । नरेन्द्र मोदी स्टेडियम अहमदाबादमा टस हारेर ब्याटिङको निम्तो पाएको भारतले निर्धारित २० ओभरमा ६ विकेट गुमाउँदै १ सय ५६ रन बनायो ।

विराट कोहली ४६ बलमा ८ चौका र ४ छक्का सहित ७७ रनमा अविजित रहे । कोहलीको यो लगातार दोस्रो अर्धशतक हो । दोस्रो खेलमा कोहलीले ७३ रनको विजयी इनिङ खेलेका थिए । हार्दिक पान्ड्या १५ बलमा २ छक्का सहित १७ रनमा आउट भए । छैटौं विकेटका लागि विराट र हार्दिकले ३५ बलमा ७० रनको उत्कृष्ट साझेदारी गरे ।

सुरुवाती दुबै खेलमा खराब प्रर्दशन गरेका ओपनर लोकेश राहुल (केएल) तेस्रो खेलमा पनि शून्यमा आउट भए । तेस्रो ओभरको तेस्रो बलमा तीव्र गतिका बलर मार्क वुडले राहुललाई शून्यमा बोल्ड आउट गरे । राहुल पहिलो खेलमा एक र दोस्रो खेलमा शून्यमा आउट भएका थिए । पाँचौं ओभरको चौथो बलमा रोहित शर्मालाई वुडलेनै जोफ्रा आर्चरबाट १५ रनमा क्याच गराउँदै इंग्ल्यान्डलाई राम्रो सुरुवात दिलाए । रोहितले १७ बलमा २ चौका प्रहार गरे ।

छैटौं ओभरको दोस्रो बलमा युवा ब्याट्सम्यान ईशान किशनलाई क्रिस जोर्डनले विकेटकिपर जस बटलरबाट ४ रनमा क्याच आउट गराए । ऋषभ पन्त १२ औं ओभरको पहिलो बलमा २५ रनमा रन आउट हुन पुगेपछि भारत दबाबमा परेको थियो । पन्तले २० बलमा ३ चौका प्रहार गरे । १५ औं ओभरको तेस्रो बलमा मार्क वुडले श्रेयस ऐरलाई डेविड मलानबाट ९ रनमा क्याच आउट गराएपछि भारत ८६–५ को कमजोर अवस्थामा पुगेको थियो । तर कोहली र हार्दिकले उत्कृष्ट साझेदारी गर्दै इनिङ उकासे ।

इंग्ल्यान्डका तीव्र गतिका बलर मार्कवुडले ४ ओभरमा ३१ रन खर्चेर ३ विकेट लिए । क्रिस जोर्डनले ४ ओभरमा १ मेडन सहित ३५ रन खर्चेर २ विकेट लिए ।