एजेन्सी – मध्यक्रमका ब्याट्सम्यान डरेन ब्राभोको शतकमा घरेलु टोली वेस्टइन्डिजले श्रीलंकाविरुद्ध तीन खेलको ओडिआई सिरिज क्लिनस्विप गरेको छ । आइतबार राती सम्पन्न तेस्रो ओडिआई खेलमा वेस्टइन्डिजले श्रीलंकालाई ५ विकेटले हराउँदै ३–० ले सिरिज जितेको हो ।

जितका लागि २ सय ७५ रनको विजयी लक्ष्य पछ्याएको वेस्टइन्डिजले ४८.३ ओभरमा ५ विकेटको क्षतिमा पूरा गर्यो । वेस्टइन्डिजका डरेन ब्राभोले १ सय ३२ बलमा ५ चौका र ४ छक्का सहित १ सय २ रनको शतकीय इनिङ खेले । ब्राभोको यो ओडिआई करिअरको चौथो शतक हो ।

ओपनर शाई होपले ७२ बलमा ३ चौका र २ छक्का सहित ६४ रनमा आउट भए । कप्तान काइरन पोलार्ड ४२ बलमा ४ चौका र १ छक्का सहित ५३ रनमा अविजित रहे । एभिन लुइस १३, निकोलस पुरन १५ र जेसन मोहम्मद ८ रनमा आउट भए । श्रीलंका सुरुगां लकमलले सर्वाधिक २ विकेट लिए । वानिन्दु हसरंगा डी शिल्भा, थिसेरा परेरा र दनुष्का गुणथिलाका ले १–१ विकेट लिए ।

त्यसअघि टस हारेर पहिला ब्याटिङ थालेको श्रीलंकाले ५० ओभरमा ६ विकेट गुमाउँदै २ सय ७४ रन बनाएको थियो । श्रीलंका वानिन्दु हसरंगा डी शिल्भा ६० बलमा ७ चौका र ३ छक्का सहित सर्वाधिक ८० रनमा अविजित रहे । एशेन बान्डारा ७४ बलमा ३ चौका र १ छक्का सहित ५५ रनमा अविजित रहे । सातौं विकेटका लागि हसरंगा डी शिल्भा र बान्डाराले १ सय २३ रनको अविजित साझेदारी गरेका थिए ।

ओपनर दनुष्का गुणथिलाका ३६, कप्तान दिमुथ करुणारत्ने ३१, पथम निसान्का २४, दीनेश चान्डिमल १६ र दसुन सनका २२ रनमा आउट भए । वेस्टइन्डिजका अकिल होसिनले १० ओभरमा ३३ रन खर्चेर ३ विकेट लिए ।

पहिलो खेलमा वेस्टइन्डिज ८ विकेट र दोस्रो खेलमा ५ विकेटले विजयी भएको थियो । अव वेस्टइन्डिज र श्रीलंकाबीच दुई टेष्ट सिरिज हुने छ । पहिलो टेष्ट २१ मार्चदेखि सुरु हुने छ ।