एजेन्सी – कप्तान तिलकरत्ने दिलशानको उत्कृष्ट अलराउन्ड प्रर्दशनमा श्रीलंका लेजेन्ड्स रोड सेफ्टी विश्व टि२० सिरिजको सेमिफाइनलमा पुगेको छ ।

श्रीलंका लेजेन्ड्सले आइतबार इंग्ल्यान्ड लेजेन्ड्सलाई ६ विकेटले पराजित गर्दै शीर्षस्थानमा रहँदै सेमिफाइनलमा स्थान बनाएको हो । जितको लागि ७९ रनको सामान्य विजयी लक्ष्य श्रीलंका लेजेन्ड्सले ७.३ ओभरमा ३ विकेट गुमाउँदै पूरा गर्यो । कप्तान तिलकरत्ने दिलशानले विष्फोटक ब्याटिङ गर्दै २६ बलमा ११ चौका र १ छक्का सहित ६१ रनमा अविजित रहे । इंग्ल्यान्डका मोन्टी पेनेसरले ४ ओभरमा २६ रन खर्चेर ४ विकेट लिए ।

त्यसअघि सहिद वीर नारायण सिंह इन्टरनेशनल स्टेडियम रायपुरमा टस हारेर पहिला ब्याटिङ थालेको इंग्ल्यान्ड लेजेन्ड्सले २० ओभरमा ९ विकेट गुमाउँदै ७८ रन बनाएको थियो । क्रिस ट्रेमलेट १० बलमा ३ छक्का सहित सर्वाधिक २२ रन बनाए । जिम ट्राटनले १८ रन बनाउन बाहेक अन्यले राम्रो प्रर्दशन गर्न सकेनन् । ९ खेलाडीले दोहोरो अंकमा रन बनाउन सकेनन् । श्रीलंका दिलशानले ४ ओभरमा १ मेडन सहित ६ रन खर्चेर ४ विकेट लिए । रंगना हेराथले २ विकेट लिए ।

श्रीलंका लेजेन्ड्स ६ खेलमा ५ मा जित र १ मा हार सहित २० अंकका साथ शीर्ष स्थानमा लिग अन्त्य गरेको छ । भारत ६ खेलमा ५ मा जित र १ मा हार सहित समान २० अंकका साथ दोस्रो स्थानमा रह्यो । यी दुबै टोली सेमिफाइनलमा पुगि सकेका छन् । दक्षिण अफ्रिका ५ खेलमा ३ मा जित र २ मा हार सहित १२ अंकका साथ तेस्रो स्थानमा छ । इंग्ल्यान्ड लेजेन्ड्स ५ खेलमा ३ मा जित र २ मा हार सहित १२ अंकका साथ चौथो स्थानमा छ । वेस्टइन्डिज ५ खेलमा ३ मा हार र २ मा जित सहित पाँचौं स्थानमा छ । बंगलादेश ५ खेलमा १ मा जित र ४ मा हार सहित पुछारमा छ ।