एजेन्सी – युवा लेगस्पिनर राशिद खानको उत्कृष्ट कीर्तिमानी बलिङको सहयोगमा अफगानिस्तानले दोस्रो टेष्ट खेलमा जिम्बावेलाई ६ विकेटले पराजित गरेको छ ।

योसँगै दुई टेष्ट खेलको सिरिज १-१ को बराबरीमा सकिएको छ । जितको लागि १ सय ८ रनको विजयी लक्ष्य पछ्याएको अफगानिस्तानले २६.१ ओभरमा ४ विकेट गुमाउँदै पूरा गर्यो । अफगानिस्तानका रहमत शाहले ५८ र इब्राहिम जद्रानले २९ रनको योगदान दिए । जिम्बावेका रायल बुर्ल र मुर्जाबानीले २-२ विकेट लिए ।

फलोअनमा परेको जिम्बावेले दोस्रो इनिङमा ३ सय ६५ रनमा अल आउट भयो । कप्तान शन विलियम्स ३ सय ९ बलमा १३ चौका र १ छक्का सहित १ सय ५१ रनमा अविजित रहे ।

डोनाल्ड तिरिपानो २ सय ५८ बलमा १६ चौका सहित ९५ रनमा आउट भए । आठौं विकेटका लागि शन र डोनाल्डले १ सय ८७ रनको उत्कृष्ट साझेदारी गरेका थिए । अफगानिस्तानका राशिद खानले ७ विकेट लिए । राशिद खानले दोस्रो टेष्टमा समग्रमा ९९.२ ओभर बलिङ गर्दै १ सय ३७ रन खर्चेर ११ विकेट लिएका थिए । जुन २१ औं शताब्दीमा गरेको सर्वाधिक धेरै बलिङ पर्दछ ।

त्यसअघि जिम्बावे पहिलो इनिङमा २ सय ८७ रनमा अल आउट हुँदै फलोअनमा परेको थियो । जिम्बावेका सिकन्दर राजाले सर्वाधिक ८५ रन बनाए । अफगानिस्तानका राशिद खानले ४ र अमिर हम्जाले ३ विकेट लिए ।

शेख जायद स्टेडियम आबूधाबीमा टस जितेर पहिला ब्याटिङ थालेको अफगानिस्तानले पहिलो इनिङमा ५४५-४ को अवस्थामा इनिङ समाप्तिको घोषणा गरेको थियो । अफगानिस्तानका हशमतुल्लाह शाहिदी ४ सय ४३ बलमा २१ चौका र १ छक्का सहित २ सय रनमा अविजित रहे । समग्रमा अफगानिस्तानबाट टेष्टमा शतक प्रहार गर्ने उनी तेस्रो खेलाडी हुन् ।

कप्तान अस्गर अफगान २ सय ५७ बलमा १४ चौका र २ छक्का सहित १ सय ६४ रनमा आउट भए । अफगानको पनि टेष्ट करिअरको पहिलो शतक हो । चौथो विकेटका लागि हशमतुल्लाह शाहिदी र अस्गर अफगानले ३ सय ७ रनको उत्कृष्ट साझेदारी गरेपछि अफगानिस्तान पहिलो इनिङमा आफ्नो टेष्ट इतिहासकै सर्वाधिक योगफल हो । उक्त साझेदारी अफगानिस्तानबाट टेष्टमा बनेको सर्वाधिक पर्दछ ।

इब्राहिम जद्रान १ सय ३० बलमा ८ चौका सहित ७२ रनमा क्याच आउट भए । जावेद अहमद ४ र रहमात शाह २३ रनमा आउट भए । नसिर जमाल ५५ रनमा अविजित रहे । जिम्बावेका रयान र्बुल, मुर्जाबानी र भिक्टर न्याउची १–१ विकेट लिए ।

पहिलो टेष्टमा जिम्बावे १० विकेटले विजयी भएकोा थियो । जिम्बावेका कप्तान शन विलियम्स प्लेयर अफ द सिरिज भए ।