काठमाडौं (हाम्रो खेलकुद) – त्रिभुवन आर्मी क्लब कप्तान विनोद भण्डारीले काठमाडौं मेयर कप–२०७७ एकदिवसिय क्रिकेट लिगमा बागमती प्रदेशविरुद्ध आक्रामक शतक प्रहार गरेका छन् ।

टियु मैदानमा जितको लागि २ सय ६७ रनको विजयी लक्ष्य पछ्याउने क्रममा कप्तान विनोदले उत्कृष्ट शतक प्रहार गर्दै टोलीलाई जिततर्फ अघि बढाएका छन् । विनोदले ९६ बलमा ८ चौका र ५ छक्का सहित शतक प्रहार गरेका छन् । विनोदले ४२ औं ओभरको चौथो बलमा स्पिनर अरियो पौडेललाई लङअङतर्फ बल प्रहार गर्दै सिंगलका साथ शतक पूरा गरेका थिए । आर्मीले ४२ ओभरमा ७ विकेट गुमाउँदै २ सय ३३ रन बनाएको छ ।

विनोदले अघिल्लो महिना सम्पन्न प्रधानमन्त्री कप राष्ट्रिय एकदिवसिय क्रिकेट प्रतियोगितामा गण्डकी प्रदेशविरुद्ध १ सय ११ रनको अविजित शतकीय इनिङ खेलेका थिए । घरेलु क्रिकेटका विनोदको यो तेस्रो शतक हो ।

लोकेश ३८ बलमा ७ चौका र १ छक्का सहित ४६ रनमा आउट भए । हरि चौहान ९, रोहित कुमार पौडेल १५, कुशल मल्ल शून्य, राजेश ९ रनमा आउट भए । स्पिनर अरियो पौडेल र रामनरेश गिरीले २–२ विकेट लिए । नन्दन यादव, पारस खड्का र सोनु देवकोटाले १–१ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको बागमती ४९.४ ओभरमा २ सय ६६ रनमा अल आउट भएको थियो । बागमतीका पारस खड्काले १ सय ३३ बलमा ११ चौका र २ छक्का सहित १ सय १९ रनको सानदार शतकीय इनिङ खेलेका थिए ।