काठमाडौं (हाम्रो खेलकुद) – नेपालले हङकङमा जारी आइसिसी महिला विश्वकप छनोटमा लगातार दोस्रो जित हासिल गरेको छ । करुणा भण्डारीको प्रदर्शनबाट प्रेरित नेपालले बिहीबार आयोजक हङकङलाई ६ रनले हराउँदै विश्वकप छनोटको सम्भावना जीवित राखेको छ । यसअघि नेपालले चीनमाथि जित हासिल गरेको थियो । त्यसअघिका दुई खेलमा नेपाल हङकङ र थाइल्यान्डसँग पराजित भएको थियो । प्रतियोगितामा सहभागी सबै टोलीले एक अर्कासँग दुई पटक खेल्नुपर्ने भएकाले आज पुनः नेपाल र हङकङबीच प्रतिस्पर्धा भएको थियो । यी दुई टोलीको पहिलो भेटमा हङकङ ६ विकेटले विजयी भएको थियो । ४ खेलमा नेपालको अंक ४ छ ।

कमजोर ब्याटिङ गर्नाका वावजुद नेपालले ७५ रनको झिनो स्कोरको बचाउ गरेको थियो । ७६ रनको लक्ष्य पछ्याएको हङकङले १७.४ ओभरमा सबै विकेट गुमाएर ६९ रनमात्र बनाउन सकेको थियो । हङकङलाई लक्ष्यमा पुग्नबाट रोक्ने क्रममा करुणाको भूमिका महत्वपूर्ण रह्यो । ४ ओभर बलिङ गरेकी करुणाले १७ रन खर्चेर ३ विकेट लिएकी थिइन् । करुणा प्लेयर अफ दी म्याच चुनिएकी थिइन् । सरिता मगरले ४ ओभरमा १५ रन दिएर २ विकेट लिइन् भने कप्तान रुविना क्षेत्री, निर्मलाकुमारी र सवनम राईले पनि समान १ विकेट हात पारे ।
हङकङका लागि तीन खेलाडीले मात्र दोहोरो आकडामा रन जोड्न सके । कारे चानले १८, कप्तान मारिको हिलले १३ र किनु गिलले १० रन बनाइन् ।
त्यसअघि टस जितेर ब्याटिङ गरेको नेपालको प्रदर्शन पनि कमजोर रह्यो । ब्याटिङमा पनि करुणाले सबैभन्दा बढी स्कोर गरिन् । २७ बलमा उनले २ चौकाका सात उच्च १९ रन बनाइन् । इन्दु बर्माले १५, ज्योति पाण्डेले ११ र नेरी थापाले १० रन जोडिन् । अन्य खेलाडीले दोहोरो अंकमा रन बनाउन सकेनन् । छनोटको अर्को खेलमा चीनले थाइल्यान्डलाई ३ विकेटले हराएको छ । छनोटमा शुक्रबार नेपाल र थाइल्यान्ड तथा हङकङ र चीनबीच प्रतिस्पर्धा हुनेछ । शीर्ष टोली अर्को बर्ष हुने आइसिसी महिला विश्वकप ग्लोबल छनोटमा पुग्नेछ ।