एजेन्सी – शीर्षक्रमका ब्याट्सम्यान तथा विकेटकिपर उपुल थरंगाको उत्कृष्ट ब्याटिङको सहयोगमा श्रीलंका लेजेन्ड्सले रोड सेफ्टी विश्व टि२० सिरिजमा बंगलादेश लेजेन्ड्समाथि ४२ रनको सहज जित हात पारेको छ ।

जितको लागि १ सय ८१ रनको विजयी लक्ष्य पछ्याएको बंगलादेश लेजेन्ड्सले निर्धारित २० ओभरमा ६ विकेट गुमाउँदै १ सय ३८ रन बनायो ।

ओपनर नाजिमुद्दीनले ४१ बलमा ५ चौका र २ छक्का सहित सर्वाधिक ५४ रन बनाए । मेहराब हुसेन २७ र खलिद मसुद २८ रन बनाए । श्रीलंका कप्तान तिलकरत्ने दिलशानले ३ र धम्मिका प्रसादले २ विकेट लिए ।

त्यसअघि रायपुरमा टस जितेर पहिला ब्याटिङ थालेको श्रीलंका लिजेन्ड्सले निर्धारित २० ओभरमा ६ विकेट गुमाउँदै १ सय ८० रन बनाएको थियो । श्रीलंका उपुल थरंगा ४७ बलमा ११ चौका र ५ छक्का सहित ९९ रनमा अविजित रहे । शतक बनाउन अन्तिम बलमा दुई रन आवश्यक हुँदा नन स्ट्राइका नुवान कुलसेकरा दोस्रो रन बटुल्ने क्रममा रन आउट हुन पुगेपछि थरंगा शतक बनाउन एक रनले चुकेका थिए । ओपनर तथा कप्तान तिलकरत्ने दिलशान ३३, सनथ जयसूर्या ४, चमेरा शिल्भा २४ र महरुफ १२ रनमा आउट भए । बंगलादेशका मोहम्मद शारिफ, राजिन सालेह र मोहमम्द रफिकले १–१ विकेट लिए ।

श्रीलंका ५ खेलमा ४ मा जित र १ मा हार सहित शीर्षस्थानमा छ । बंगलादेश ३ खेलमानै पराजित हुँदै पुछारमा छ । श्रीलंकाले आइतबार इंग्ल्यान्ड र बंगलादेशले शुक्रबार वेस्टइन्डिजसँग खेल्ने छ ।