एजेन्सी – कप्तान केविन पिटरसनको उत्कृष्ट ब्याटिङको सहयोगमा इंग्ल्यान्ड लेजेन्ड्सले रोड सेफ्टी विश्व सिरिजमा घरेलु टोली भारत लेजेन्ड्समाथि ६ रनको रोमान्चक जित हात पारेको छ ।

जितको लागि १ सय ८९ रनको विजयी लक्ष्य पछ्याएको भारत लेजेन्ड्सले निर्धारित २० ओभरमा ७ विकेट गुमाउँदै १ सय ८२ रन बनायो । भारतलाई जितको लागि अन्तिम ६ बलमा १९ रन चाहिँएको थियो । तर तीव्र गतिका बलर रयान साइडबोटमले १२ रन खर्चिदै जित पक्का गराए ।

भारतका अलरान्डर इरफान पठान ३४ बलमा ४ चौका र ५ छक्का सहित ६१ रनमा अविजित रहे । मनप्रीत गोनीले तल्लोक्रममा आक्रामक ब्याटिङ गर्दै १६ बलमा १ चौका र ४ छक्का सहित ३५ रनमा अविजित रहे ।

सचिन तेन्दुलकर ९, विरेन्द्र सहवाग ६ र मोहम्मद कैफ १ रनमा आउट भए । युवराज सिंह २२, एस बद्रिनाथ ८ र युसुफ पठान १७ रनमा आउट भए । इंग्ल्यान्डका मोन्टी पेन्सरले सर्वाधिक ३ विकेट लिए । जेम्स ट्रेडवेल २ विकेट लिए ।

त्यसअघि टस हारेर पहिला ब्याटिङ थालेको इंग्ल्यान्ड लेजेन्ड्सले निर्धारित २० ओभरमा ७ विकेट गुमाउँदै १ सय ८८ रन बनाएको थियो । इंग्ल्यान्डका कप्तान केविन पिटरसनले ३७ बलमा ६ चौका र ५ छक्का सहित ७५ रनको योगदान दिए । फिल मस्टर्डले १४, डरेन म्याडी २९, क्रिस स्कोफिल्ड र गेविन ह्यामिल्टनले १५–१५ रन बनाए ।

भारतका युसुफ पठानले ३ र इरफान पठानले २ विकेट लिए । भारत लेजेन्ड्सले अव दक्षिण अफ्रिका लेजेन्ड्ससँग शनिबार खेल्ने छ । इंग्ल्यान्ड लेजेन्ड्सले बिहिबार दक्षिण अफ्रिका लेजेन्ड्ससँगै खेल्ने छ ।