एजेन्सी – ओपनर ब्याट्सम्यान विरेन्द्र सहवागको विष्फोटक ब्याटिङमा भारत लेजेन्ड्सले रोड सेफ्टी विश्व टि२० सिरिजमा बंगलादेश लेजेन्ड्सलाई १० विकेटले पराजित गरेको छ ।

जितको लागि १ सय १० रनको विजयी लक्ष्य पछ्याएको भारत लेजेन्ड्सले १०.१ ओभरमा कुनै विकेट नगुमाई पूरा गर्यो । भारतका ओपनर विरेन्द्र सहवाग ३५ बलमा १० चौका र ५ छक्का सहित ८० रनमा अविजित रहँदै टोलीलाई सानदार जित दिलाए । भारतीय पूर्व कप्तान सचिन तेन्दुलकर २६ बलमा ५ चौका सहित ३३ रनमा अविजित रहे ।

त्यसअघि शहिद वीर नारायण सिंह अन्तर्राष्ट्रिय स्टेडियम रायपुरमा टस जितेर पहिला ब्याटिङ थालेको बंगलादेश १९.४ ओभरमा १ सय ९ रनमा अल आउट भएको थियो । बंगलादेशका ओपनर नाजिमुद्दीन ३३ बलमा ८ चौका र १ छक्का सहित सर्वाधिक ४९ रन बनाए । जावेद ओमर र राजेन सालेहले १२–१२ रन बनाए । अन्यले राम्रो पर्दशन गर्न सकेनन् । भारतका युवराज सिंह, प्रज्ञान ओझा र विनय कुमारले २–२ विकेट लिए ।

यस सिरिज गतवर्ष मार्चमा सुरु भएपनि कोरोना भाइरसको कारण स्थगित हुन पुगेको थियो । शुक्रबार देखि पुन: सुचारु भएको छ । प्रतियोगितामा भारत, बंगलादेश, श्रीलंका, दक्षिण अफ्रिका, इंग्ल्यान्ड र वेस्टइन्डिजका लेजेन्डसबीच प्रतिस्पर्धा हुने छ ।