काठमाडौं (हाम्रो खेलकुद) – नेपाल पुलिस क्लबका मध्यक्रमका प्रमुख ब्याट्सम्यान आरिफ शेखले शनिबार सुरु हुने काठमाडौं मेयर कप–२०७७ नखेल्ने भएका छन् । मेयर कपको लागि पुलिसले मन्जित श्रेष्ठको कप्तानीमा दुई नयाँ अनुहार समेट्दै १५ सदस्य टोली घोषणा गरेको छ ।

पुलिसले गत महिना काठमाडौंमा सम्पन्न चौथो संस्करणको प्रधानमन्त्री कप एक दिवसिय क्रिकेट प्रतियोगिताबाट दुई खेलाडी परिवर्तन गरेको छ। आरिफ प्रधानमन्त्री कप क्रिकेटको बेला सेमिफाइनलमा एपिएफसँगको खेलमा खुट्टामा चोट लागेको थियो । युवा तीव्र गतिका बलर गुल्सान झालाई पहिलो पटक टोलीमा समेटेको छ । नेपालबाट यू१९ खेलि सकेका विकेटकिपर ब्याट्सम्यान अभिनाश कर्णलाई पनि पुलिसले टोलीमा समेटेको छ ।

गुल्सान र अभिनाशले प्रदेश–२ बाट घरेलु क्रिकेट खेल्ने गर्दछन् । पुलिसले पहिलो खेल शनिबार बागमती प्रदेशसँग मुलपानी क्रिकेट मैदानमा खेल्ने छ । आइतबार टियुमा पुलिसले एपिएफसँग खेल्ने छ । मंगलबार मुलपानीमा पुलिसले त्रिभुवन आर्मी क्लबसँग खेल्ने छ । पुलिसले बुधबार काठमाडौं मेयर ११ सँग टियुमा खेल्ने छ । पुलिस प्रधानमन्त्री कपको सेमिफाइनलमा एपिएफसँग ३० रनले पराजित हुँदै बाहिरिएको थियो ।

पुलिसको टोली : मन्जित श्रेष्ठ (कप्तान), दीलिप नाथ, कुशल भुर्तेल, अनिल शाह, अमित श्रेष्ठ, दीपेन्द्र सिंह ऐरी, गुल्सान झा, सुनिल धमला, सागर ढकाल, ललित नारायण राजवंशी, राशिद खान, प्रेम तामाङ, पवन सरार्फ, अभिनाश कर्ण र योगेन्द्र कार्की