एजेन्सी – कप्तान काइरन पोलार्डको ६ बलमा ६ छक्कासँगै वेस्टइन्डिजले श्रीलंकालाई पहिलो टि२० खेलमा ४ विकेटले पराजित गरेको छ । योसँगै तीन टि२० आई खेलको सिरिजमा घरेलु टोली वेस्टइन्डिजले १–० को अग्रता लिएको छ ।

जितका लागि १ सय ३२ रनको विजयी लक्ष्य पछ्याएको वेस्टइन्डिजले १३.१ ओभरमा ६ विकेट गुमाउँदै पूरा गर्यो । वेस्टइन्डिजका कप्तान पोलार्डले ११ बलमा ६ छक्का सहित सर्वाधिक ३८ रनको योगदान दिए । पोलार्डले छैटौं ओभरमा स्पिनर अकिला धनञ्जयलाई लगातार ६ बलमा ६ छक्का प्रहार गरेका थिए ।

त्यसअघि धनञ्जयले चौथो ओभरको दोस्रो बलमा एभिन लुइस, तेस्रो बलमा क्रिस गेल र चौथो बलमा निकोलस पुरनलाई आउट गर्दै ह्याट्रिक लिएका थिए । वेस्टइन्डिजलाई ओपनर लेन्डन सिमन्स र एभिन लुइसले आक्रामक सुरुवात दिलाएका थिए । सिमन्स १५ बलमा ३ चौका र २ छक्का सहित २६ रनमा आउट भए ।

लुइस १० बलमा २ चौका र ३ छक्का सहित २८ रनमा क्याच आउट भए । क्रिस गेल र निकोलस पुरन गोल्डेन डक आउट हुन पुगे । जेसन होल्डर २४ बलमा १ चौका र २ छक्का सहित २९ रनमा अविजित रहे । श्रीलंका अकिला धनञ्जयले ४ ओभरमा ६२ रन खर्चेर ३ विकेट लिए । वानिन्दु हसरंगाले ४ ओभरमा १२ रन खर्चेर ३ विकेट लिए ।

त्यसअघि टस हारेर पहिला ब्याटिङ गरेको श्रीलंकाले निर्धारित २० ओभरमा ९ विकेट गुमाउँदै १ सय ३१ रन बनाएको थियो । श्रीलंका पथम निसान्कांले सर्वाधिक ३४ बलमा ४ चौका र १ छक्का सहित सर्वाधिक ३९ रन बनाए ।

ओपनर निरोशन डिक्वेलाले ३३, दीनेश चान्डिमल ११ र वानिन्दु हसरंगा १२ रनमा आउट भए । वेस्टइन्डिजका ओबेद म्याकोय सर्वाधिक २ विकेट लिए । ड्वेन ब्राभो, फिडेल एडवार्डस, जेसन होल्डर, फबियन एलेन र केविन सिन्क्लेयरले १-१ विकेट लिए । दोस्रो टि२० खेल शनिवार बिहान हुने छ ।