एजेन्सी – न्युजिल्यान्डले अष्ट्रेलियाविरुद्ध दोस्रो टि२० आई खेलमा ४ रनको रोमान्चक जित हात पारेको छ । यो सँगै पाँच टि२० आई खेलको सिरिजमा घरेलु टोली न्युजिल्यान्डले २–० को अग्रता लिएको छ ।

जितका लागि २ सय २० रनको विशाल विजयी लक्ष्य पछ्याएको अष्ट्रेलियाले निर्धारित २० ओभरमा ८ विकेट गुमाउँदै २ सय १५ रन बनायो । अष्ट्रेलियालाई जितको लागि अन्तिम ओभरमा १५ रन आवश्यक परेको थियो । अलराउन्डर जेम्श निशमले १० रन खर्चिदै २ विकेट लिएपछि न्युजिल्यान्डले रोमान्चक जित हात पारेको हो । निशमको पहिलो बलम ड्यानियल साम्स ग्लेन फिलिप्सबाट मिड विकेटमा क्याच आउट हुन पुगे ।

त्यसपछि स्टोइनिसले लगातार दुई बलमा कुनै रन जोडेनन् । स्टोइनिसले चौथो बलमा लङअनमा उत्कृष्ट छक्का प्रहार गर्दै खेललाई रोमान्चक बनाएका थिए । पाँचौ बलमा स्टोइनिस लिडिङ एज लाग्दै टिम साउथीबाट क्याच आउट भएपछि जितको सम्भावना टाढिएको थियो । अन्तिम बलमा झेय रिचर्डसनले चौका प्रहार गरेपनि त्यो जितको लागि सम्भव थिएन ।

अष्ट्रेलिया अलराउन्डर मार्कस स्टोइनिसले ३७ बलमा ७ चौका र ५ छक्का सहित ७८ रनको उत्कृष्ट इनिङ खेलेपनि टोलीको हार भने टार्न सकेनन् । साम्सले १५ बलमा २ चौका र ४ छक्का सहित ४१ रनको योगदान दिए । एक समय १३ ओभरमा ११३–६ को कमजोर अवस्थामा पुगेको अष्ट्रेलियालाई सातौं विकेटका लागि साम्स र स्टोइनिसले ९२ रनको उत्कृष्ट साझेदारी गर्दै खेललाई रोमान्चक बनाएका थिए ।

युवा विकेटकिपर जोश फिलिपे ३२ बलमा ३ छक्का र २ चौका सहित ४५ रनको योगदान दिए । मिचेल सान्टनारले १२ औं ओभरमा फिलिपे, एस्टन अगर र मिचेल मार्शलाई आउट गर्दै अष्ट्रेलियालाई संकटमा पुर्याएका थिए । अगर र मार्शले खाता खोल्न सकेनन् । ओपनर म्याथ्यु वेड १५ बलमा ३ चौका र १ छक्का सहित २४ रनमा क्याच आउट भए । आरोन फिन्च १२ र ग्लेन म्याक्सवेल ३ रनमा आउट भए ।

न्युजिल्यान्डका स्पिनर मिचेल सान्टनारले ४ ओभरमा ३१ रन खर्चेर ४ विकेट लिए । जेम्श निशमले १ ओभरमा १० रन खर्चेर २ विकेट लिए । ईश सोधी र टिम साउथीले १–१ विकेट लिए ।

त्यसअघि बिहिबार बिहान युनिभर्सिटी ओभल डुनेडिनमा टस हारेर पहिला ब्याटिङको निम्तो पाएको न्युजिल्यान्डले २० ओभरमा ७ विकेट गुमाउँदै २ सय १९ रन बनाएको थियो । न्युजिल्यान्डका ओपनर मार्टिन गुप्टिलले सर्वाधिक ९७ रनको योगदान दिए ।

ड्यानिल साम्सको १५ औं ओभरको चौथो बलमा ठूलो सट खेल्नेक्रममा मार्कस स्टोइनिसबाट लङअफमा समातिन पुगेपछि गुप्टिल करिअरको तेस्रो टि२० आई शतक बनाउन ३ रनले चुकेका थिए । गुप्टिलले ५० बलमा ६ चौका र ८ छक्का प्रहार गरे । अर्का ओपनर टिम सिफर्ट चौथो ओभरको पहिलो बलमै ३ रनमा क्याच आउट हुन पुगे । केन रिचर्डसनको बलमा आरोन फिन्चबाट सिफर्ट क्याच हुँदा न्युजिल्यान्डले कुल २० रन बनाएको थियो ।

दोस्रो विकेटका लागि विलियम्सन र गुप्टिलले ७० बलमा १ सय ३१ रनको उत्कृष्ट साझेदारी गर्दै विशाल योगफलको आधार तय गरेका थिए । एडम जाम्पाले १६ औं ओभरको पाँचौं बलमा बोल्ड आउट गर्नुअघि विलियम्सनले ३५ बलमा ३ छक्का र २ चौका सहित ५३ रनको योगदान दिए ।

आक्रामक इनिङ खेलेका जेम्स निशम १६ बलमा ६ छक्का र १ चौका सहित ४५ रनमा अविजित रहँदै उत्कृष्ट अन्त्य गरे । ग्लेन फिलिप्स ८, देभन कन्वे २, टिम साउथी ६ र मिचेल सान्टनार शून्यमा आउट भए ।

अष्ट्रेलिया तीव्र गतिका बलर केन रिचर्डसनले ४ ओभरमा ४३ रन खर्चेर ३ विकेट लिए । झेय रिचर्डसन, एडम जाम्पा र ड्यानियल साम्सले १–१ विकेट लिए ।

पहिलो खेलमा न्युजिल्यान्ड ५३ रनले विजयी भएको थियो । तेस्रो खेल ३ मार्चमा हुने छ ।