एजेन्सी – इन्डियन प्रिमियर लिग (आइपिएल) २०२१ को अक्सन अघि फ्रेन्चाइज टोली किंग्स इलेभेन पन्जाबले आफ्नो नाम र लोगो परिवर्तन गरेको छ । अव नयाँ नाम पन्जाब किंग्स रहने छ ।

लोगो सिंहको राखेको छ । उसको लोगो चेन्नई सुपर किंग्ससँग मिल्दो जुल्दो छ । अक्सन विहिबार चेन्नईमा हुँदै छ । पन्जाबले अक्सनमा ९ खेलाडी अनुबन्ध गर्न पाउने छ । जसमा ५ विदेशी कोटा खाली छ । पन्जाबसँग अक्सनमा खर्च गर्न पाउने कुल रकम ५३ करोड २० लाख भारु बाँकी छ ।

पन्जाबको कप्तान लोकेश राहुलले पछिल्लो सिजन देखि गर्दै आएका छन् । पन्जाब आइपिएलको एक असफल टोली हो । उक्त असफलको कारण नाम र लोगो परिवर्तन गर्न पुगेको हो । यसअघि सन् २०१९ मा दिल्ली क्यापिटल्सले पनि लगातार असफलको कारण आफ्नो नाम र लोगो परिवर्तन गरेको थियो । त्यसअघि दिल्ली डेयरडेभिल्स थियो । दिल्ली गत सिजनमा पहिलो पटक फाइनलमा पुगेको थियो ।

पन्जाब हालसम्म एक पटक मात्र फाइनलमा पुगेको छ । २०१४ मा फाइनलमा पुगेपनि कोलकाता नाइट राइडर्ससँग ३ विकेटले पराजित भएको थियो । पन्जाब सन् २००८ मा सेमिफाइनलमा पुगेको थियो । त्यसबाहेक अन्य सबै संस्करणमा पन्जाब सुरुवाती चरणबाटै बाहिरिएको छ ।

पन्जाब २०२१ अक्सन अघि आफ्नो नाम र लोगो परिवर्तन गर्दै भाग्य फेर्न चाहन्छ । पन्जाबमा मोहित ब्रुमान, नेस वाडिया, प्रीति जिन्टा र करण पउलको स्वामित्वमा रहेको फ्रेन्चाइज टोली हो । २०२० मा पन्जाब छैटौं स्थानमा रहँदै बाहिरिएको थियो ।