एजेन्सी – भारतीय क्रिकेट टोलीका पूर्व कप्तान सचिन तेन्दुलकरका छोरा अर्जुन तेन्दुलकरले एकै ओभरमा पाँच छक्का प्रहार गरेका छन् ।

अर्जुनले मुम्बई क्रिकेट एसोसिएसनले आयोजना गरेको पुलिस आमान्त्रिण शिल्ड क्रिकेट प्रतियोगिता २०२०–२१ मा आइतबार एमआइजी क्रिकेट क्लबबाट उत्कृष्ट अलराउन्ड प्रदर्शन गरे । बलरका रुपमा टोलीमा रहेका उनी ईस्लाम जिमखानाविरुद्ध २६ बलमा ५ चौका र ८ छक्का सहित ७७ रनमा अविजित रहे ।

बायाँ हाते तीव्र गतिका बलर अर्जुनले स्पिनर हशीर दफेदारलाई एकै ओभरमा पाँच छक्का प्रहार गरेका थिए । अर्जुनको अलराउन्ड प्रर्दशनमा एमआइजीले इस्लाम जिमखानालाई १ सय ९४ रनले पराजित गर्यो । एमआइजीले निर्धारित ४५ ओभरमा ७ विकेटको क्षतिको ३ सय ८५ रन बनाएको थियो । प्रग्नेश कानपिलिवार ७५ बलमा १० चौका र ६ छक्का सहित १ सय १२ रनको उत्कृष्ट शतकीय इनिङ खेले । ओपनर केभिन अल्मेडा ९० बल खेल्दै १५ चौका र १ छक्का सहित ९६ रनमा आउट भए । इस्लामका विराज गाम्रेले सर्वाधिक ३ विकेट लिए ।

जितका लागि ३ सय ८६ रनको विजयी लक्ष्य पछ्याएको इस्लाम जिमखाना ४१.५ ओभरमा १ सय ९१ रनमा अल आउट भएको थियो । जसक्रममा अर्जुनले ९ ओभरमा २ मेडन सहित ४१ रन खर्चेर ३ विकेट लिएका थिए ।

अर्जुनले फेब्रुअरी १८ मा चेन्नईमा हुने आइपिएल अक्सनको लागि आफ्नो नाम न्यूनतम मूल्य ३२ लाख नेपाली रुपैयाँमा दर्ता गराएका छन् । २१ वर्षिय बायाँ हाते तीव्र गतिका बलर अर्जुनले भारतको उमेर समूह र घरेलु क्रिकेट खेलि सकेका छन् । अर्जुनलाई मुम्बई इन्डियन्सले भित्र्याउन सक्ने उच्च सम्भावना छ ।