चितवन (हाम्रो खेलकुद) – मुनस्कोट क्रिकेट क्लबले १७ औं संस्करणको ‘प्रेम मार्केट चितवन च्याम्पियनसिप ट्रफी–२०७७ को उपाधि जितेको छ ।

ग्लोबल इन्टरफेस इस्टर्न क्रिकेट एकेडेमीलाई सोमबार भएको फाइनल खेलमा ४ विकेटले पराजित गर्दै मुनस्टोन च्याम्पियन बनेको हो । उपाधिसंगै मुनस्टोनले २० हजार र उपविजेता इस्टर्नले १० हजार रुपैयाँ प्राप्त गर्यो ।

धुर्मुस–सुन्तली फाउण्डेशनको अगुवाईमा रामपुरमा निर्माण भइरहेको गौतमबुद्ध अन्तर्राष्ट्रिय क्रिकेट रंगशालाको नमुना खेल मैदानमा भएको फाइनलमा जितका लागि २ सय ६४ रनको विजयी लक्ष्य पछ्याएको मुनस्टोनले ४१ ओभरमा ६ विकेटको क्षतिमा पूरा गर्यो ।

मुनस्टोनका युवा अलराउन्डर योगेन्द्र सिंह कार्कीले ६० बलमा ५२ र भिम सार्कीले ३४ बलमा ४६ रनको योगदान दिए । युवा आक्रामक ब्याट्सम्यान लोकेश बमले १८ बलमा ३९ जोडेका थिए । इस्टर्नका सुमित महर्जनले ९ ओभरमा एक मेडनसहित ४८ रन खर्चिदै ३ विकेट लिए ।

त्यसअघि टस जितेर पहिले व्याटिङ रोजेको इस्र्टनले निर्धारित ४५ ओभरमा ७ विकेटको क्षतिमा २ सय ६३ रन बनाएको थियो । तीव्र गतिका बलर नन्दन यादवले अविजित ३५ बलमा ८३ जोडेपनि टोलीलाई उपाधि दिलाउन सकेनन् । सुमित महर्जनले ३१ बलमा ५१ र कप्तान आकाश थापाले ३६ रन बनाए ।

मुनस्टोनका भीम सार्की र हरिबहादुर चौहानले २–२ विकेट लिए । योगेन्द्र सिंह कार्कीले एक विकेट लिए । फाइनल खेलमा मुनस्टोनका योगेन्द्र सिंह कार्की म्यान अफ दि म्याच घोषित भए । तीन वटै खेलमा म्यान अफ दि म्याच घोषित भएका योगेन्द्र म्यान अफ दि सिरिज समेत घोषित भए । विपिन खत्री उत्कृष्ट बलर र सुमित महर्जन उत्कृष्ट व्याट्सम्यान घोषित भए ।

चितवन क्रिकेट संघको आयोजनामा भएको प्रतियोगिता माघ २७ गतेदेखि सुरु भएको थियो । विजेता र उपविजेतालाई नेपाल क्रिकेट संघ बागमती प्रदेश समितिका अध्यक्ष राजु बस्न्यात, प्रेम सुपर मार्केटका प्रमुख एवंम समाजसेवी प्रेम कुमार श्रेष्ठ, धुर्मुस–सुन्तली फाउण्डेशनकी उपाध्यक्ष कुञ्जना घिमिरे ‘सुन्तली’, र चितवन क्रिकेट संघका पदाधिकारीलगायतले पुरस्कार वितरण गरेका थिए ।