एजेन्सी – इंग्ल्यान्डले भारतसँगको दोस्रो टेष्ट खेलमा आफ्नो टोलीमा चार परिवर्तन गर्ने पक्का भएको छ । शनिबार चेन्नईमा विहान ९:४५ देखि सुरु हुने दोस्रो टेष्टको लागि इंग्ल्यान्डले १२ सदस्य टोलीको नाम सार्वजनिक गरेको छ ।

पहिलो टेष्ट जिताउँदा चार महत्वपूर्ण खेलाडी दोस्रो टेष्टमा हुने छैनन् । इंग्ल्यान्डले पहिलो टेष्टमा भारतलाई २ सय २७ रनको फराकिलो अन्तरले हराउँदै चार टेष्ट खेलको सिरिजमा १–० को अग्रता लिएको छ । इंग्ल्यान्डले पहिलो खेलको जितमा उत्कृष्ट प्रर्दशन गर्ने तीव्र गतिका बलर जेम्स एन्डरसन, जोफ्रा आर्चर, स्पिनर डोमिनिक बेस र विकेटकिपर जस बटलरलाई दोस्रो टेष्टमा समेटेको छैन ।

आर्चर बायाँ हातको कुइनोमा चोट लाग्दा टोली बाहिर हुन् । बटलर, एन्डरसन र बेसलाई विश्राम दिएको हो । फेब्रुअरी २४ देखि सुरु हुने तेस्रो डे नाइट टेष्टको लागि प्रमुख तीन खेलाडीलाई विश्राम दिएको हुन सक्ने अनुमान गरिएको छ ।

इंग्ल्यान्डले स्पिन अलराउन्डर मोइन अली, तीव्र गतिका बलर स्टुअर्ट ब्रोड, क्रिस वोक्स, ओली स्टोन र विकेटकिपर बेन फोक्सलाई १२ सदस्य टोलीमा राखेको छ । बेन फोक्सले जस बटलरको स्थानमा खेल्ने छन् । अलीले बेसको स्थान लिने छन् । एन्डरसनको स्थानमा ब्रोड र आर्चरको स्थानमा वोक्सलाई खेलाउने सम्भावना देखिन्छ ।

पहिलो टेष्ट खेलमा जित दिलाउन एन्डरसन र आर्चरले पहिलो इनिङमा २–२ र बेसले चार विकेट लिएका थिए । दोस्रो इनिङमा एन्डरसनले ३, आर्चर र बेसले एक एक विकेट लिएका थिए । जस बटलरले पहिलो इनिङमा ३० र दोस्रो इनिङमा २४ रन बनाएका थिए । इंग्ल्यान्डलाई जिताउन कप्तान जो रुटले पहिलो इनिङमा २ सय १८ रनको दोहोरो शतकीय इनिङ खेलेका थिए । दोस्रो खेलमा रुटसँगै बेन स्टोक्स, मोइन अली र ब्रोडको प्रर्दशन महत्त्वपूर्ण हुनेछ ।

यता भारतले भने दोस्रो टेष्टको लागि आफ्नो नाम सार्वजनिक गरेको छैन । स्पिनर शहबाज नदिमको स्थानमा अक्षर पटेल वा कुलदीप यादवलाई मौका दिने सम्भावना उच्च छ । आइसिसी वल्र्ड टेष्ट च्याम्पियनसिपको फाइनलमा पुग्ने आशा कायमै राख्न भारतलाई दोस्रो टेष्ट जित्नै पर्ने हुन्छ । अन्यथा भारतको टेष्ट च्याम्पियनसिप फाइनल खेल्ने सम्भावना सकिने छ ।

इंग्ल्यान्डलाई टेष्ट च्याम्पियनसिप खेल्न तीन खेल जित्नै पर्ने हुन्छ । न्युजिल्यान्ड फाइनलमा पुगि सकेको छ । भारत, इंग्ल्यान्ड र अष्ट्रेलिया मध्य एक टोलीले फाइनलमा न्युजिल्यान्डसँग प्रतिस्पर्धा गर्ने छ ।

दोस्रो टेष्टको लागि इंग्ल्यान्डको सुरुवाती १२ खेलाडी :

जो रुट (कप्तानं), मोईन अली, स्टुअर्ट ब्रोड, रोरी बर्न्स, बेन फोक्स (विकेटकिपर), ड्यान लरेन्स, ज्याक लेच, ओली पोप, डोम सिब्ले, बेन स्टोक्स, ओली स्टोन र क्रिस वोक्स