एजेन्सी – ओपनर तथा विकेटकिपर मोहम्मद रिजवानको शतकको सहयोगमा दक्षिण अफ्रिकासँगको पहिलो टि२० आई खेलमा घरेलु टोली पाकिस्तान ३ रनले विजयी भएको छ । योसँगै पाकिस्तानले तीन टि२० आई खेलको सिरिजमा १–० को अग्रता लिएको छ ।

जितको लागि १ सय ७० रनको विजयी लक्ष्य पछ्याएको दक्षिण अफ्रिकाले निर्धारित २० ओभरमा ६ विकेट गुमाउँदै १ सय ६६ रन बनायो । जितको लागि अन्तिम ओभरमा दक्षिण अफ्रिकालाई १९ रन चाहिँदा फहिम अशराफले १५ रन खर्चिदै पाकिस्तानको जित पक्का गरेका थिए ।

दक्षिण अफ्रिका ओपनर रिजा हेनड्रिक्सले ४२ बलमा ८ चौका सहित सर्वाधिक ५४ रनको योगदान दिए । अर्का अ‍ोपनर जानेमान मलान २९ बलमा ८ चौका र १ छक्का सहित ४४ रनमा बोल्ड आउट भए । तल्लोक्रमका ब्याट्सम्यान चल्न नपक्दा दक्षिण अफ्रिका पराजित हुन पुगेको हो ।

कप्तान हेनरिक क्लासेन १२ र एन्डिले फेहलुकवयो १४ रनमा आउट भए । ड्वाइन प्रिटोरियस १५ र ब्योर्न फोर्टुइन १७ रनमा अविजित रहे । पाकिस्तानका लेग स्पिनर उस्मान कादिरले ४ ओभरमा २१ रन खर्चेर २ विकेट लिए । हरिस रउसले २ र फहिम अशराफले १ विकेट लिए ।

त्यसअघि गद्दाफी स्टेडियम लाहोरमा टस हारेर पहिला ब्याटिङ थालेको घरेलु टोली पाकिस्तानले निर्धारित २० ओभरमा ६ विकेट गुमाउँदै १ सय ६९ रन बनाएको थियो । पाकिस्तानका ओपनर तथा विकेटकिपर मोहम्मद रिजवान ६४ बलमा ६ चौका र ७ छक्का सहित १ सय ४ रनमा अविजित रहे ।

रिजवानको यो टि२० आई करिअरको पहिलो शतक हो । उनले अन्तिम ओभरको चौथो बलमा एन्डिले फेहलुकवयोलाई छक्का प्रहार गर्दै ६३ बलमा शतक पूरा गरेका थिए । उनी पाकिस्तानबाट तीनै शैलीमा शतक प्रहार गर्ने पहिलो विकेटकिपर ब्याट्सम्यान हुन् । विश्वका दोस्रो विकेटकिपर ब्याट्सम्यान पर्दछन् ।

यसअघि तीनै शैलीमा न्युजिल्यान्डका विकेटकिपर ब्रेन्डम म्याकुलमले शतक प्रहार गरेका थिए । हैदर अली २१, हुसेन ट्यालेट १५ र खुसदिल शाह १२ रनमा आउट भए । कप्तान बाबर आजम शून्यमा रन आउट भए । दक्षिण अफ्रिका एन्डिले फेहलुकवयोले सर्वाधिक २ विकेट लिए । तबरेज शाम्सी, लुथो सिपम्ला र ब्योर्न फोर्टुइन १–१ विकेट लिए ।

दोस्रो टि२० खेल शनिवार हुने छ । यसअघि दुई टेष्ट सिरिजमा पाकिस्तानले क्लिनस्विप गरेको थियो ।