एजेन्सी – वेस्टइन्डिजका मध्यक्रमका ब्याट्सम्यान काईल मेयर्सले बंगलादेशलाई पहिलो टेष्ट खेलमा ३ विकेटले हराउन डेब्यू खेलमा अविश्वसनिय र कीर्तिमानी दोहोरो शतकीय अविजित इनिङ खेले ।

जितको लागि ३ सय ९५ रनको विशाल विजयी लक्ष्य पाएको वेस्टइन्डिजले ७ विकेट गुमाउँदै पूरा गरेको थियो । चौथो दिनको समाप्तिमा वेस्टइन्डिज लक्ष्य पछ्याउने क्रममा ११०/३ को अवस्थामा थयो । क्रिजमा नक्रुमाह बोनर १५ र काइल मेयर्स ३७ रनमा अविजित थिए ।

दुवै खेलाडी वेस्टइन्डिजबाट पहिलो टेष्ट खेलेको हुँदा हारबाट बच्न वेस्टइन्डिजले अन्तिम दिन बराबरीको लागि संघर्ष र प्रतिस्पर्धा गर्ने अनुमान गरिएको थियो । तर पाँचौ दिन यी दुई डेब्यूम्यानले बंगलादेशविरुद्ध २ सय १६ रनको दोहोरो शतकीय साझेदारी गरेपछि खेलले नयाँ मोड लिएको थियो ।

पहिलो इनिङमा १ सय ७१ रनले पछि परेको वेस्टइन्डिजले अन्तिम दिनको खेल सकिन १५ बल अगाडि जित पक्का गरेको थियो । टेष्ट क्रिकेट इतिहासमा डेब्यू खेलमा दोहोरो शतक प्रहार गर्ने २८ वर्षिय मेयर्स विश्वका छैटौं र वेस्टइन्डिजका दोस्रो खेलाडी थिए । डेब्यू खेलको चौथो इनिङमा दोहोरो शतक प्रहार गर्ने पहिलो खेलाडी बने । मेयर्स ३ सय १० बलमा २० चौका र ७ छक्का सहित २ सय १० रनमा अविजित रहँदै जित दिलाए ।

को हुन् बंगलादेशलाई घरेलु मैदानमा स्तब्ध पार्दै दोहोरो शतक प्रहार गर्ने काइल मेयर्स ?

उनको पूरा नाम काइल रिको मेयर्स हो । उनको जन्म १९९२ सेप्टेम्बरमा बार्बाडोसमा भएको हो । बायाँ हाते ब्याट्सम्यान उनले मध्यगतिमा बलिङ गर्ने गर्दछन् । यू१५ देखि वेस्टइन्डिजबाट खेलेका थालेका हुन् । सन् २००८ मा उनले यू१५ प्रतियोगितामा मलेसिया, पाकिस्ताान र अमेरिकासँग खेलेका थिए ।

वर्तमान टोलीमा रहेको क्रेग ब्रेथवेट, जोहन क्याम्पवेल र जर्मेन ब्लाकवुडले उमेर समूहमा सँगै खेलेका थिए । सन् २०१० मा मेयर्सले यू१९ विश्वकप टोलीमा परेनन् । २०१२ को विश्वकपमा भने प्रतिनिधित्व गरेका थिए । सन् २०१५ मा उनले विन्वर्ड आइसल्यान्डबाट गुयानाविरुद्ध प्रथम श्रेणीको खेलमा डेब्यू गरेका थिए । दुर्भाग्य उक्त खेलमा शून्यमा आउट भए ।

सन् २०१९ मा बार्बाडोसबाट रिजन सुपर ५० प्रतियोगिता खेल्दै राम्रो प्रर्दशन गरे । वेस्टइन्डिज च्याम्पियनसिप सिजन २०१९/२० को प्रथम श्रेणीमा ६ सय ४५ रन जोडेका थिए । दुई शतक सामेल थिए । त्यसै सिजनमा लिष्ट ए प्रतियोगितामा उनले आफ्नो करिअरको पहिलो शतक प्रहार गरेपछि छनोटसमितिले वेस्टइन्डिजको टोलीमा बोलाएको थियो ।

२०२० को क्यारेवियन प्रिमियर लिग (सिपिएल) मा बार्बाडोसबाट खेल्दै तल्लोक्रममा उत्कृष्ट ब्याटिङ गर्दै एक अर्धशतकका साथ २ सय २२ रन बनाएका थिए । वेस्टइन्डिजले जुलाईमा इंग्ल्यान्ड भ्रमण गर्दा मेयर्स ७ वैकल्पिक खेलाडीको सूचिमा थिए । मेयर्स आक्रामक ब्याटिङसँगै टोलीको आवश्यकता अनुसार ब्याटिङको क्षमता राख्ने गर्दछन् ।

गत नोभेम्बरमा उनले न्युजिल्यान्डविरुद्ध टि२० आईमा डेब्यू गरेका थिए । वेस्टइन्डिज ए बाट न्युजिल्यान्ड ए विरुद्ध प्रथम श्रेणी खेल खेलेका थिए । त्यहाँ पनि उनको प्रर्दशन औसत रह्यो । वेस्टइन्डिजले बंगलादेश भ्रमणमा आफ्ना प्रमुख सिनियर खेलाडीलाई विश्राम दिएपछि मेयर्सले ओडिआई र टेष्ट टोलीमा मौका पाएका थिए ।

गत जनवरीमा उनले बंगलादेशविरुद्ध ओडिआईमा डेब्यू गरे । टोली १ सय २२ रनमा समेटिदा उनले सर्वाधिक ४० रनको योगदान दिएका थिए । बंगलादेशविरुद्ध उनी दोस्रो ओडिआई खेलमा उनी शून्यमा रन आउट हुन पुगे । तेस्रो खेलमा ११ रनमा आउट भए । टेष्टको पहिलो खेलमा उनलाई वेस्टइन्डिजले डेब्यू गराएको थियो । पहिलो इनिङमा उनी ४० रनमा स्पिनर मेहिदी हसन मिराजबाट आउट हुन पुगे ।

बंगलादेश भ्रमणमा वेस्टइन्डिजका ब्याट्सम्यानले स्पिनरविरुद्ध संघर्ष गर्नुपरेको छ । तर मेयर्सले स्पिनरको सामना गर्दै डेब्यूमा कीर्तिमानी दोहोरो शतक पूरा गरे । डेब्यूमा उनको ब्याटिङ एक सपनाको इनिङजस्तै थियो । पछिल्लो दशक वेस्टइन्डिज टि२० क्रिकेटमा बढी केन्द्रित हुँदा एकदिवसिय र टेष्ट क्रिकेटमा कमजोर बन्दै गएको छ । मेयर्सको दोहोरो शतकले वेस्टइन्डिजलाई नयाँ आशा र उत्साह थप्ने छ ।

‘म सधैं सकरात्मक रहन्छु र मेरो क्षमतामा विश्वास गर्छु । हामी त्यो लक्ष्यमा पुग्न सक्छौं भन्ने विश्वास थियो । हामी कहिल्यै हार मान्दैनौं । सधैं प्रतिस्पर्धा गरिरहन्छौं’, खेलपछि मेयर्सले भने ।

त्यसैमा उनले थपे, ‘टेष्ट क्रिकेट खेल्न पाएर धेरै राम्रो लागेको छ । एक सय, दुई सय हुँदै जितसम्म पुग्यौं । त्यो क्षण साँच्चिकै उत्कृष्ट थियो । प्रशिक्षक, कप्तान, टोलीका सहकर्मी, परिवार र सबैलाई म धन्यावाद दिन चाहन्छु । यो डेब्यू दोहोरो शतकले युवा पुस्तालाई प्रेरित गर्नेछ ।’