एजेन्सी – नेपाली अलराउन्डर कुशल मल्लले टि१० लिगमा टिम आबूधाबीबाट डेब्यू खेलमा कलन्दर्सविरुद्ध राम्रो प्रर्दशन गरेका छन् । टिम आबूधाबीले कलन्दर्सलाई १ सय २५ रनको लक्ष्य दिएको छ ।

टस हारेर पहिला ब्याटिङको निम्तो पाएको टिम आबूधाबीले १० ओभरमा ६ विकेट गुमाउँदै १ सय २४ रन बनायो । कुशलले १२ बलमा १ चौका र १ छक्का सहित १८ रनको योगदान दिए । तेस्रो नम्बरमा ब्याटिङ गरेका कुशलको १ सय ५० को स्ट्राइक रेटमा ब्याटिङ गरेका थिए ।

पल स्टर्लिङले ९ बलमा ३ चौका र २ छक्का सहित २६ रनको योगदान दिए । लियोनार्डो जुलिएन १९ रनको योगदान दिए । नजिबुल्लाह जद्रानले १६ बलमा ५ चौका र २ छक्का सहित ४५ रनमा अविजित रहे । मोहम्मद जैदले सर्वाधिक २ विकेट लिए ।

यस्तो रह्यो कुशलको ब्याटिङ

कुशलले तेस्रो ओभरमै ब्याटिङ गर्ने मौका पाएका थिए । ओपनर पल स्टर्लिङ आउट भएपछि कुशल तेस्रो ओभरको तेस्रो बलको सामना गर्न मैदान छिरेका थिए । पाकिस्तानका तीव्र गतिका बलर डान्याल अहमदको नो बलमा एक रन लिँदै टि१० को सुरुवात गरे । पाँचौ बलमा रन जोड्न नसकेपनि अन्तिम बलमा एक रन लिँदै स्ट्राइक आफैं राखेका थिए ।

चौथो ओभरमा पाकिस्तानै तीव्र गतिका बलर मोहमम्मद जैदको पहिलो बलमा लेग वाईको रुपमा एक रन जोडेका थिए ।

पाँचौं ओभरमा कुशलले विश्व फ्रेन्चाइज लिगमा राम्रो पहिचान बनाएका अमेरिका तीव्र गतिका बलर अली खानलाई छक्का प्रहार गरेका थिए । पहिलो बलमा खानले नो बल गरेका थिए । कुशलले एक रन जोडे । दोस्रो बलमा दुई रन बटुले । चौथो बलमा कुशलले अली खानलाई छक्का प्रहार गरेका थिए ।

छैटौं ओभरमा कुशलले खुर्सीद अनवारलाई दोस्रो बलमा चौका प्रहार गरेका थिए । तेस्रो बलमा एक रन लिए । सातौं ओभरको चौथो बलमा मोहम्मद जैदको योर्करमा कुशल मल्ल १८ रनमा बोल्ड आउट हुन पुगे ।