एजेन्सी – अष्ट्रेलिया बिग ब्यास लिग २०२०/२१ सिजनको उपाधि सिड्नी सिक्सर्सले जितेको छ । सिक्सर्सले शनिबार फाइनलमा पर्थ स्कोचर्सलाई २७ रनले हराउँदै उपाधि जितेको हो ।

सिड्नी क्रिकेट मैदानमा टस हारेर पहिला ब्याटिङ थालेको सिक्सर्सलेले निर्धारित २० ओभरमा ६ विकेट गुमाउँदै १ सय ८८ रन बनाएको थियो । ओपनर जेम्स भिन्सले ६० बलमा १० चौका र ३ छक्का सहित ९५ रनको योगदान दिएका थिए । ओपनर तथा विकेटकिपर जोश फिलिपे ९, मोइजेस हेनरिक्स १८, जोर्डन सिल्क १७ र ड्यानियल क्रिष्टियनले २० रनको योगदान दिए । पर्थका झेय रिचर्ड्सन र एन्ड्रुय टाईले २–२ विकेट लिए ।

जितका लागि १ सय ८९ रनको विजयी लक्ष्य पछ्याएको पर्थले निर्धारित २० ओभरमा ९ विकेट गुमाउँदै १ सय ६१ रन बनाउन सक्यो । लियाम लिभिङस्टोनले ४५, क्यामरन ब्रेनकफ्ट ३०, जोश इंगलिसले २२ र आरोन हार्डेले २६ रनको योगदान दिए । बेन द्वाराहुसिले सर्वाधिक ३ विकेट लिए । ज्याक्सन बर्ड, सन एबट र ड्यानियल क्रिष्टियनले २–२ विकेट लिए ।

सिक्सर्सले गतवर्ष मेलबर्न स्टार्सलाई १९ रनले हराउँदै उपाधि जितेको थियो । सिड्नीले समग्रमा तेस्रो पटक उपाधि जितेको हो । पहिलो संस्करणमा २०११/१२ मा पर्थलाईनै हराउँदै सिक्सर्सले उपाधि जितेको थियो ।

सिक्सर्सका युवा ब्याट्सम्यान तथा विकेटकिपर जोश फिलिपे प्रतियोगिता सर्वोत्कृष्ट खेलाडी घोषित भए । फिलिपेले प्रतियोगितामा १६ खेलमा ३ अर्धशतक सहित कुल ५ सय ८ रन बनाएका थिए ।