एजेन्सी – नेपाली क्रिकेट टोलीका अलराउन्डर सोमपाल कामीलाई वेस्टइन्डिजका आक्रामक ब्याट्सम्यान क्रिस गेलले छक्का वर्षा गराउने क्रममा ह्याट्रिक गरेका छन् ।

गेलको विष्फोटक इनिङसँगै टिम आबूधाबीले मराठा अरेवियन्सलाई ९ विकेटले हराएको छ । जितको लागि ९८ रनको लक्ष्य पछ्याएको टिम आबूधाबीले ५.३ ओभरमै १ विकेट गुमाउँदै पूरा गर्यो । क्रिस गेल २२ बलमा ६ चौका र ९ छक्का सहित ८४ रनमा अविजित रहे । गेलले १२ बलमा अर्धशतक पूरा गरेका थिए ।

त्यसअघि दोस्रो ओभरमा सोमपाललाई अन्तिम तीन बलमा लगातार तीन छक्का प्रहार गरेका थिए । पल स्टर्लिङ ११ र जो क्लार्कले ५ रन जोडे । मोसाद्देक हुसेनले एक विकेट लिए । सोमपालले एक ओभरमा २७ रन खर्चिए ।

त्यसअघि टस हारेर पहिला ब्याटिङ थालेको मराठाले १० ओभरमा ४ विकेट गुमाउँदै ९७ रन बनाएको थियो । मराठाका एलिशान शरफुल ३३, मुक्तर अली १४, मोहम्मद हफिज २०, सोएब मलिक १५ रनको योगदान दिए ।

सोमपालको त्यो बिर्सनलायक एक ओभर

सोमपाल कामीले दोस्रो ओभरमा बलिङ गरेका थिए । तर प्रर्दशन सम्झनलायक हुन सकेन । सुरुवाती दुई बलमा आयरल्यान्डका ओपनर समेत पल स्टर्लिङले लगातार चौका प्रहार गरेका थिए । तेस्रो बलमा एक रन दिँदै गेललाई स्ट्राइक दिए । त्यसपछि गेलले लगातार तीन छक्का प्रहार गर्दै छक्काको ह्याट्रिक नै गरेका थिए । चौथो बलमा गेलको विकेटको सम्भावना रहेपनि लङअनमा इभान्सले क्याच ड्रप गरेका थिए ।

सोमपालको यो जारी टि१० लिगमा पाँचौं खेल हो । यसअघि पहिलो खेलमा सोमपालले नर्थन वारियर्सविरुद्ध डेब्यू गर्दै २ ओभरमा २८ रन खर्चेका थिए । दिल्ली बुल्सविरुद्ध १७ र बंगला टाइगर्सविरुद्ध १२ रन खर्चेका थिए । कलन्दर्सविरुद्ध सोमपालले एक ओभरमा १९ रन खर्चेर १ विकेट लिएका थिए ।