एजेन्सी – नेपाली क्रिकेट टोलीका अलराउन्डर करण केसी आबूधाबी टि१० लिगमा पुणे डेभिल्सबाट दिल्ली बुल्सविरुद्ध गोल्डेन डक आउट हुन पुगेका छन् ।

टस हारेर ब्याटिङ गरेको पुणेले खराब सुरुवात गरेपछि करणले पाँचौं ओभरमा ब्याटिङ गर्ने मौका पाएका थिए । यसअघिका चार खेलमा बलिङ मात्र गरेका करणले पाँचौ खेलमा पहिलो पटक ब्याटिङ गर्ने मौका पाएका थिए । तर पहिलो बलमै करण क्याच आउट हुन पुगे ।

अमेरिकाका तीव्र गतिका बलर अलि खानले करणलाई पाँचौं ओभरको पाँचौ बलमा रहमानुउल्लाह गुर्बाजबाट क्याच गराउँदै शून्यमा पेभिलिएन फर्काएका थिए । त्यसअघि चौथो बलमा कप्तान नासिर हुसेनलाई खानले अहमद बटबाट क्याच गराएपछि करण ब्याटिङको लागि आएका थिए । थर्डम्यानमा सट खेल्न खोजेपनि एज लागेर करण विकेटकिपरबाट सहज क्याच आउट हुन पुगे ।

पुणेले दिल्लीलाई ५८ रनको सामान्य लक्ष्य दिएको छ । पुणले पहिला ब्याटिङ गर्दै १० ओभरमा ७ विकेटको क्षतिमा ५७ रन बनायो । देभन थोमस १८ बलमा १ चौका सहित १५ रनमा अविजित रहे । केन्नर लुईसले १५ र टम क्याडमोरले ११ रन बनाउन बाहेक अन्य कुनैपनि ब्याट्सम्यानले दोहोरो अंकमा रन बनाउन सकेनन् । अली खानले ५ बल गर्दै कुनै रन नदिई ३ विकेट लिए । अहमद बटको नाममा २ विकेट रह्यो ।