एजेन्सी – नेपाली अलराउन्डर सोमपाल कामीले आबूधाबी टि१० लिगमा आफ्नो पहिलो विकेट लिएका छन् । सोमपालले मंगलबार मराठा अरेवियन्सबाट व्यक्तिगत चौथो खेल खेल्दै कलन्दर्सविरुद्ध पहिलो विकेट लिएका हुन् ।

सोमपालको टोली मराठा भने कलन्दर्ससँग ४ विकेटले पराजित भएको छ । जितको लागि १ सय २ रनको विजयी लक्ष्य पछ्याएको कलन्दर्सले ८.१ ओभरमा ६ विकेट गुमाउँदै पूरा गर्यो । कलन्दर्सका सर्जिल खानले १६ बलमा ३ चौका र २ छक्का सहित २८ रनको योगदान दिए । कप्तान सोहेल अख्तरले ११ बलमा १ चौका र २ छक्का सहित २० रनको योगदान दिए । बेंन डंक १२ बलमा ५ चौका सहित २६ रनमा अविजित रहे । सोमपालले एक ओभरमा १९ रन खर्चेर १ विकेट लिए । यमिन अहमदजीले २, सोएब मलिक र इशान मलहोत्रले एक एक विकेट लिए ।

त्यसअघि टस हारेर पहिला ब्याटिङ थालेको मराठाले निर्धारित १० ओभरमा ५ विकेट गुमाउँदै १ सय १ रन बनायो । मराठाका ओपनर मोहम्मद हफिजले २६ बलमा २ चौका र ३ छक्का सहित ४४ रनको योगदान दिए । सोएब मलिक २३ र अब्दुल सकुर ११ रनमा आउट भए । कलन्दर्सका सोहेल तनवीरले २ ओभरमा २२ रन खर्चेर ३ विकेट लिए । सुल्तान अहमद र डन्याल अहमदले एक एक विकेट लिए ।

सोमपालको एक ओभर

सोमपालले चौथो ओभरमा बलिङ गरेका थिए । सुरुवाती बल सर्जिल खानलाई स्लोवर गुड लेन्थमा राख्दै डटका साथ सुरुवात गरेका थिए । दोस्रो र तेस्रो बलमा सर्जिलले सोमपाललाई लगातार दुई छक्का प्रहार गरे । चौथो बलमा एक रन दिए ।

पाँचौ बलमा सोहेल अख्तरले सोमपाललाई छक्का हानेका थिए । तर सोमपालले अन्तिम बलमा योर्कर गर्दै अख्तरलाई एलबिडब्लूका साथ टि १० लिगमा पहिलो विकेट लिन सफल भएका थिए । तर रन भने एकै ओभरमा १९ खर्चिन पुगे ।

यसअघि पहिलो खेलमा सोमपालले नर्थन वारियर्सविरुद्ध डेब्यू गर्दै २ ओभरमा २८ रन खर्चेका थिए । दिल्ली बुल्सविरुद्ध १७ र बंगला टाइगर्सविरुद्ध १२ रन खर्चेका थिए ।