एजेन्सी – आबूधाबी टि१० लिगमा नेपाली अलराउन्डर करण केसी सम्मिलित पुणे डेभिल्स बंगला टाइगर्ससँग ८ विकेटले पराजित भएको छ । जितका लागि १ सय १६ रनको विजयी लक्ष्य पछ्याएको बंगलाले ८.५ ओभरमा २ विकेट गुमाउँदै पूरा गर्यो ।

बंगलाका टम मुस्र १२ बलमा १ चौका र ४ छक्का सहित ३८ रनमा अविजित रहे । चिराग सुरी १५ बलमा २ चौका र २ छक्का सहित ३० रनमा अविजित रहे । कप्तान आन्द्रे फ्लेचर १५ बलमा ३ चौका र २ छक्का सहित ३० रनमा रन आउट भए । मोहम्मद आमिरले एक विकेट लिए । करण केसीले एक ओभरमा १७ रन खर्चेपनि विकेट लिन सकेनन् ।

त्यसअघि टस हारेर पहिला ब्याटिङ थालेको पुणे डेभिल्सले १० ओभरमा ३ विकेट गुमाउँदै १ सय १५ रन बनाएको थियो । पुणेका एलेक्स डेभिस २१ बलमा ३ चौका र ३ छक्का सहित ४१ रनमा अविजित रहे । ओपनर टम क्याडमोर २५ बलमा ४ चौका र ३ छक्का सहित ४८ रनमा आउट भए । करिम जानत, काइस अहमद, फजल हकले १–१ विकेट लिए ।

यस्तो रह्यो करणको एक ओभर

करणलाई पुणेले छैटौं ओभरमा ल्याएको थियो । वेस्टइन्डिजका ओपनर तथा बंगलाका कप्तान आन्द्रे फ्लेचरले पहिलो बलमा चौका प्रहार गर्दै सुरुवात गरेका थिए । दोस्रो र तेस्रो बलमा करणलाई उनले लगातार छक्का प्रहार गरे । करणले चौथो बल डट राख्दा पाँचौं बलमा एक रन दिएका थिए । अन्तिम बलमा चिराग सुरीको क्याच प्वाइन्टमा ड्रप हुँदा करण विकेट विहिन बन्न पुगे । तर उक्त बलमा फ्लेचर भने ३० रनमा रन आउट भएका थिए ।

करणको यो चौथो खेल हो । चार खेल मध्य करण तीन खेलमा विकेटविहिन छन् । पहिलो खेलमा डेकन ग्ल्याडियटर्सविरुद्ध एक ओभरमा १७ रन खर्चेका थिए । दोस्रो खेलमा करणले कलन्दर्सविरुद्ध १ ओभर बलिङ गर्दै ९ रन खर्चेका थिए । तेस्रो खेलमा टिम आबूधाबीविरुद्ध करणले एक ओभरमा १८ रन खर्चेर १ विकेट लिएका थिए । करणले स्टइन्डिजका आक्रामक ब्याट्सम्यान क्रिस गेललाई बोल्ड आउट गरेका थिए ।