काठमाडौं (हाम्रो खेलकुद) – चौथो संस्करणको प्रधानमन्त्री कप एकदिवसिय क्रिकेट प्रतियोगिता उपाधि विजेता नेपाल आर्मी क्लबका खेलाडीलाई प्रधानसेनापति महारथी पूर्णचन्द्र थापाले सम्मान गरेका छन् ।

आइतबार नेपाली सेनाको मुख्यालय भद्रकालीमा एक कार्यक्रमकाबीच थापाले खेलाडी र प्रशिक्षकलाई सम्मान गरेका हुन् । थापाले विजेता टोलीका सम्पूर्ण सदस्यहरुलाई प्रधानसेनापति प्रशंसा निशानद्वारा सम्मानित गरेका थिए । उक्त सम्मालिन कार्यक्रममा थापाले सबै खेलाडीलाई बधाई दिँदै खुसी व्यक्त गरेका थिए ।

शनिबार फाइनलमा नेपाल एपिएफ क्लबलाई ३३ रनले हराउँदै आर्मीले एक रुपमा पहिलो उपाधि जितेको हो । टियु क्रिकेट मैदानमा टस हारेर पहिला ब्याटिङ थालेको आर्मीले ५० ओभरमा ९ विकेट गुमाउँदै २ सय ११ रन बनाएको थियो । जितका लागि २ सय १२ रनको विजयी लक्ष्य पछ्याएको एपिएफ ४१.३ ओभरमा १ सय ७८ रनमा अल आउट भएपछि आर्मी च्याम्पियन बनेको थियो ।

आर्मीले पहिलो संस्करणको फाइनलमा नेपाल पुलिस क्लबसँग वर्षाको कारण उपाधि बाँडेको थियो । दोस्रो संस्करणमा फाइनलमा आर्मी एपिएफसँग ६ विकेटले पराजित भएको थियो । तेस्रो संस्करणमा आर्मी नेपाल पुलिस क्लबसँग ४ विकेटले पराजित हुँदै लगातार च्याम्पियन बन्नबाट चुकेको थियो ।