एजेन्सी – नेपाली क्रिकेट टोलीका अलराउन्डर करण केसी सम्मिलित पुणे डेभिल्स आबूधाबी टि१० लिगमा टिम आबूधाबीसँग ५ विकेटले पराजित भएको छ ।

जितका लागि १ सय ३० रनको विजयी लक्ष्य पछ्याएको टिम आबूधाबीले ८.३ ओभरमा ५ विकेट गुमाउँदै पूरा गर्यो । टिम आबूधाबीका तल्लोक्रमका जेमी ओभरटर्नले ११ बलमा ४ चौका र ३ छक्का सहित ३८ रनमा अविजित रहँदै जित पक्का गरे । क्रिस गेल ९, पल स्टर्लिङ २३, जो क्लार्क २९ र विकेटकिपर बेन डुकेट २० रनमा आउट भए ।

करणले एक ओभरमा १८ रन खर्चेर १ विकेट लिए । करणले क्रिस गेलको विकेट लिएका थिए । हार्डस विल्जोइनले २ ओभरमा २ ओभरमा ३६ रन खर्चेर ३ विकेट लिए ।

त्यसअघि टस हारेर पहिला ब्याटिङ थालेको पुणेले निर्धारित १० ओभरमा १ सय २९ रन बनाएको थियो । पुणेका ओपनर टम क्याडमोर २५ बलमा ५ चौका र ५ छक्का सहित ६१ रनमा अविजित रहे । चाडविक वाल्टन २३ र देभन थोमसले २१ रनको योगदान दिए ।

यस्तो रह्यो करणको एक ओभर

करणले चौथो ओभरको पहिलो बलमै वेस्टइन्डिजका आक्रामक ब्याट्सम्यान क्रिस गेललाई बोल्ड आउट गरेका थिए । युनिर्भस बोसलाई आउट गर्दै टोलीलाई महत्वपूर्ण सफलता दिलाएका थिए । करणले सट बल गरेका थिए । गेल ठूलो सट खेल्ने धुनमा बल ब्याटको छेउमा लाग्दै स्टम्पमा लाग्न पुगेपछि बोल्ड भएका थिए ।

दोस्रो बल करणले वाइड फाले । अर्को बलमा लुक राइटले चौका प्रहार गर्दा तेस्रो बलमा एक दिए । चौथो, पाँचौं र छैटौं बलमा भने करणलाई जो क्लार्कले लगातार चौका प्रहार गरेपछि एकै ओभरमा १८ रन खर्चिन पुगेका थिए ।

करणको टि१० लिगमा यो तेस्रो खेल हो । यसअघि दुवै खेलमा करण विकेटविहिन बनेका थिए । करणले कलन्दर्सविरुद्ध १ ओभर बलिङ गर्दै ९ रन खर्चेका थिए । पहिलो खेलमा डेकन ग्ल्याडियटर्सविरुद्ध एक ओभरमा १७ रन खर्चेका थिए ।