काठमाडौं (हाम्रो खेलकुद) – चौथो संस्करणको प्रधानमन्त्री कप एकदिवसिय क्रिकेट प्रतियोगिता फाइनलमा नेपाल एपिएफ क्लबका ओपनर ब्याट्सम्यान आशिफ शेखले त्रिभुवन आर्मी क्लबविरुद्ध अर्धशतक प्रहार गरेका छन् ।

जितका लागि २ सय १२ रनको विजयी लक्ष्य पछ्याएको आशिफले ५६ बलमा जारी प्रतियोगितामा आफ्नो तेस्रो अर्धशतक प्रहार गरेका हुन् । आशिफले १९ औं ओभरको अन्तिम बलमा सुशन भारीलाई चौका प्रहार गर्दै अर्धशतक पूरा गरेका थिए ।

एपिएफले २१ ओभरमा ३ विकेट गुमाउँदै ९९ रन बनाएको छ । आशिफ ६१ बलमा ७ चौका र १ छक्का सहित ५० रनमा खेलि रहेका छन् । आशिफलाई सुमित महर्जनले ५ रनमा साथ दिएका छन् ।

चौथो ओभरको पहिलो बलमा जितेन्द्र मुखियाले ओपनर सुबास खकुरेललाई १४ रनमा विकेटकिपर विनोद भण्डारीबाट क्याच गराउँदै पहिलो सफलता दिलाए । सुबासले १५ बलमा ३ चौका प्रहार गरे । लगत्तै अर्को बलमा कप्तान शरद भेषावकर कटविहाइन्ड हुँदै गोल्डेन डग आउट हुन पुगे ।

तेस्रो विकेटका लागि आशिफ र शंकर रानाले ७१ रनको साझेदारी गर्दै इनिङलाई अघि बढाएका थिए । स्पिनर साहब आलमले २० औं ओभरको चौथो बलमा शंकरलाई विनोदलाई २१ रनमा क्याच गराउँदै साझेदारी तोडेका थिए । शंकरले ४७ बलमा ३ चौका प्रहार गरे ।