एजेन्सी – नेपाली राष्ट्रिय क्रिकेट टोलीका अलराउन्डर करण केसी आबूधाबी टि१० लिगमा सम्मिलित पूणे डेभिल्सबाट लगातार दोस्रो खेल खेल्ने भएका छन् ।

पुणेले कलन्दर्सविरुद्ध पहिला ब्याटिङ गर्दै छ । कलन्दर्सका कप्तान सोहेल अख्तरले टस जितेर पहिला बलिङ गर्ने निर्णय लिएका छन् । पुणेका कप्तान नासिर होसेनले बुझाएको प्लेइङ ११ को सूचिमा करण पनि छन् ।

पुणेले बिहिबार डेकन ग्ल्याडियटर्सलाई ७ विकेटले हराउँदै विजयी सुरुवात गरेको हो । जितको लागि १ सय ५ रनको विजयी लक्ष्य पछ्यायको पुणेले ९.२ ओभरमा ३ विकेट गुमाउँदै पूरा गरेको थियो । उक्त खेलमा करणले एकै ओभरमा १७ रन खर्चिन पुगेका थिए ।

दोस्रो खेलमा सोमपाल सम्मिलित मराठा अरेवियन्सले दिल्ली बुल्ससँग खेल्ने छ । खेल नेपाली समय अनुसार साँझ ८ः०० बजे सुरु हुने छ । पहिलो खेलमा मराठाले नर्थन वारियर्सलाई ५ विकेटले हराएको थियो । दिल्ली बुल्सले बंगला टाइगर्सलाई ७ विकेटले हराउँदै विजयी सुरुवात गरेको थियो ।

सोमपाल टोलीको प्रमुख तीब्र गतिका बलर रहँदै पहिलो र अन्तिम ओभर बलिङ गरेका थिए । २ ओभरमा सोमपालले २८ रन खर्चेका थिए । आजको खेलमा पनि सोमपाल प्रमुख बलरको रुपमा खेल्ने सम्भावना छ ।

त्यस्तै आजको अन्तिम खेलमा कुशल मल्ल सम्मिलित टिम आबूधाबीले डेकनसँग खेल्ने छ । खेल राती १०:१५ बजे सुरु हुने छ ।