एजेन्सी – संयुक्त अरव इमिरेट्स (यूएई) मा जारी आबूधाबी टि टेन लिगको दोस्रो दिन शुक्रबार तीन खेल हुँदै छन् । तीनै खेलमा नेपाली क्रिकेट टोलीका अलराउन्डर सोमपाल कामी, करण केसी र कुशल मल्ल खेल्दै छन् ।

पहिलो खेलमा करण सम्मिलित पुणे डेभिल्सले कलन्दर्ससँग खेल्ने छ । खेल नेपाली समय अनुसार साँझ ५ः४५ बजे सुरु हुने छ । पुणेले पहिलो खेलमा डेकन ग्याडियटर्सलाई ७ विकेटले हराउँदै विजयी सुरुवात गरेको थियो ।

करणले भने एक ओभरमा १७ रन खर्चेका थिए । आजको खेलमा करण बेन्चमा पर्न सक्छन् । करणको ठाउँमा श्रीलंका थिसेरा परेरालाई खेलाउन सक्ने सम्भावना देखिन्छ ।

दोस्रो खेलमा सोमपाल सम्मिलित मराठा अरेवियन्सले दिल्ली बुल्ससँग खेल्ने छ । खेल नेपाली समय अनुसार साँझ ८ः०० बजे सुरु हुने छ । पहिलो खेलमा मराठाले नर्थन वारियर्सलाई ५ विकेटले हराएको थियो । दिल्ली बुल्सले बंगला टाइगर्सलाई ७ विकेटले हराउँदै विजयी सुरुवात गरेको थियो ।

सोमपाल टोलीको प्रमुख तीब्र गतिका बलर रहँदै पहिलो र अन्तिम ओभर बलिङ गरेका थिए । २ ओभरमा सोमपालले २८ रन खर्चेका थिए । आजको खेलमा पनि सोमपाल प्रमुख बलरको रुपमा खेल्ने सम्भावना छ ।

त्यस्तै आजको अन्तिम खेलमा कुशल मल्ल सम्मिलित टिम आबूधाबीले डेकनसँग खेल्ने छ । खेल राती १०ः १५ बजे सुरु हुने छ । टिम आबूधाबीमा क्रिस गेल, एलेक्स हेल्स, पल स्टर्लिङ, क्रिस मोरिस, रोहन मुस्तफा लगायतका खेलाडी छन् ।

जसको कारण कुशललाई टोलीमा स्थान बनाउन केहि कठिन देखिन्छ । तर टि टेन मा अलराउन्डरका साथ टोली मैदान उत्रने हुँदा कुशलको पनि सम्भावना देखिन्छ ।