काठमाडौं (हाम्रो खेलकुद) – नेपाल पुलिस क्लबले चौथो संस्करणको प्रधानमन्त्री कप एकदिवसिय क्रिकेट प्रतियोगिता प्रदेश २ लाई ४ विकेटले हराउँदै सेमिफाइनलमा प्रवेश गरेको छ ।

साविक विजेता पुलिस समूह बी बाट उप विजेताको रुपमा सेमिफाइनलमा प्रवेश गर्दा लुम्बिनी प्रदेश भने बाहिरिएको छ । समूह बी बाट विजेताको रुपमा आइतबारनै बागमती प्रदेश सेमिफाइनलमा पुगेको थियो ।

जितको लागि १ सय ७० रनको विजयी लक्ष्य पछ्याएको पुलिसले ३८ ओभरमा ६ विकेट गुमाउँदै पूरा गर्यो । पुलिसका विकेटकिपर अनिल कुमार शाह ६९ बलमा ४ चौका सहित ४७ रनमा अविजित रहे । कप्तान मञ्जित श्रेष्ठ ६ बलमा १ चौका र १ छक्का सहित १२ रनमा अविजित रहे ।

ओपनर कुशल भुर्तेल ५५ बलमा ३ चौका र १ छक्का सहित ४३ रनमा आउट भए । सुनिल धमला १३, अमित श्रेष्ठ र दीपेन्द्रसिंह ऐरी १७–१७ रनमा आउट भए । आरिफ शेख शून्यमा आउट हुँदा पवन सरार्फ ३ रनमा आउट भए । प्रदेश २ का स्पिनर कुमार थापाले ८ ओभरमा ४४ रन खर्चेर ३ विकेट लिए । विवेक यादवले ६ ओभरमा १९ रन खर्चेर ३ विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङ थालेको प्रदेश २ ले ४७ ओभरमा ९ विकेट गुमाउँदै १ सय ६९ रन बनाएको थियो । प्रदेश २ का ओपनर हरिशंकर शाह ८४ बलमा ५ चौका र १ छक्का सहित सर्वाधिक ५३ रनमा रन आउट भए । हरिशंकरले ७७ बलमा अर्धशतक पूरा गरेका थिए । हरि शंकरको यो लगातार दोस्रो अर्धशतक हो । हरिशंकरले यस अघि आइतबार सुदूरपश्चिम प्रदेशविरुद्ध ६० रनको इनिङ खेलेका थिए ।

सातौं ओभरको दोस्रो बलमा हिमान्शु दत्त १६ रनमा रन आउट हुन पुगेका थिए । उनले २० बलमा ३ चौका प्रहार गरे । रवि शाहलाई स्पिनर ललितनारायण राजवंशीले सागर ढकालबाट ९ रनमा क्याच आउट गराए । २६ औं ओभरको चौथो बलमा पवन सरार्फले रवि सिंहलाई १२ रनमा बोल्ड आउट गरेका थिए ।

तल्लोक्रमका विशाल शुश्लिङ १२, विवेक यादव ९, आदिल अन्सारी १५, राहुल प्रताप सिंह ७ र सुरज कुर्मी १३ रनमा आउट भए । कुमार थापा ८ रनमा अविजित रहे ।

पुलिसका सागर ढकालले १० ओभरमा ३ मेडन सहित ३६ रन खर्चेर २ विकेट लिए । ललित नारायण राजवंशीले ८ ओभरमा १ मेडन सहित ३७ रन खर्चेर ४ विकेट लिए । पवन सरार्फले १ विकेट लिए ।

बागमती ४ खेलमा ३ मा जित र १ मा बराबरीका साथ ७ अंकका साथ समूह बी बाट विजेता बन्यो । पुलिस ४ खेलमा ३ मा जित र १ मा हार सहित ६ अंंकका साथ दोस्रो स्थानमा रह्यो । लुम्बिनी ४ खेलमा २ मा जित, १ मा हार र १ मा बराबरीका साथ ५ अंकका साथ तेस्रो स्थानमा रहँदै बाहिरियो । सुदूरपश्चिम ४ खेलमा ३ मा हार र १ मा जित सहित चौथो स्थानमा रह्यो । प्रदेश २ चार खेलमानै पराजित हुँदै अंक विहिन हुँदै बाहिरियो । प्रदेश २ पहिलो पटक जित विहिन हुँदै बाहिरिएको छ ।

सेमिफाइनलमा लुम्बिनीले समूह ए को उप विजेता र पुलिसले विजेता सँग खेल्ने छ । समूह ए बाट नेपाल एपिएफ क्लब र त्रिभुवन आर्मी क्लब सेमिफाइनलमा पुगेका छन् । टियु मैदानमा जारी यी दुई खेलको विजेता टोलीले समूह विजेता र उपविजेताको निर्धारण गर्ने छ । सेमिफाइनल बुधबार र बिहिबार हुने छ । फाइनल शनिबार हुने छ ।