काठमाडौं (हाम्रो खेलकुद) – चौथो संस्करणको प्रधानमन्त्री कप एकदिवसिय क्रिकेट प्रतियोगितामा आज समूह चरणका अन्तिम दुई खेल हुँदै छन् ।

टियुमा समूह ‘ए’ का त्रिभुवन आर्मी क्लब र नेपाल एपिएफ क्लब भिड्ने छन् । मुलपानीमा समूह ‘बी’ का नेपाल पुलिस क्लब र प्रदेश दुई भिड्ने छन् । दुवै खेल महत्वपूर्ण छन् । यी दुई खेलको नतिजाले सेमिफाइनल समिकरण पूरा हुने छ ।

आर्मी र एपिएफबीचको नतिजाले समूह ‘ए’ को विजेता निर्धारण गर्ने छ । दुबै टोली सुरुवाती तीन खेलमा अपराजित छन् । एपिएफमा ओपनर आशिफ शेखले खेलेका दुवै खेलमा उत्कृष्ट अर्धशतक प्रहार गरेका छन् ।

सन्दीप जोराले पछिल्लो खेलमा कर्णालीविरुद्ध अर्धशतक प्रहार गरेका थिए । कप्तान शरद भेषावकर र सुबास खकुरेललाई उत्कृष्ट इनिङ खेल्न आवश्यक देखिन्छ । स्पिनर वसन्त रेग्मी र भुवन कार्की आर्मीलाई घातक बन्न सक्छन् । अभिनाश बोहरा र कमलसिंह ऐरी तीव्र गतिका हतियार हुन् ।

यता आर्मीका कप्तान विनोद भण्डारी प्रमुख हतियार हुन् । गण्डकीविरुद्ध शतक प्रहार गरेका विनोद राम्रो लयमा छन् । रोहित कुमार पौडेल, भिम सार्की, राजु रिजाल र अनिल मन्डलको ब्याटिङले धेरै प्रभाव पार्ने छ ।

स्पिनर साहब आलम र सुशन भारी टोलीका हतियार हुन् । विक्रम शोब, जितेन्द्र मुखिया र आकाश चन्द तीव्र गतिका बलिङ जोडीको रुपमा छन् । सोमपाल कामी, करण केसी र कुशल मल्ल नहुँदा आर्मी केहि कमजोर देखिएको छ ।

अर्को खेलमा पुुलिसलाई सेमिफाइनलमा पुग्न आजको खेल जित्नै पर्ने दबाब छ । समूह ‘बी’ बाट विजेताको रुपमा बागमती सेमिफाइनलमा पुगि सकेको छ । पुलिस पराजित भएको खण्डमा भने लुम्बिनी सेमिफाइनलमा पुग्ने छ ।

पछिल्लो खेलमा लुम्बिनीविरुद्ध शतक प्रहार गरेका सुनिल धमला, १३ बलमै अर्धशतक प्रहार गरेका पवन सरार्फ र आक्रामक अर्धशतक बनाएका दीपेन्द्र सिंह ऐरी ब्याटिङ हतियार हुन् । अनिलकुमार शाह र कुशल भुर्तेललाई ठूलो इनिङ खेल्न आवश्यक देखिन्छ । सागर ढकाल र ललितनारायण राजवंशी स्पिन हतियार हुन् ।

यता प्रदेश २ का युवा ब्याट्सम्यान विवेक यादव राम्रो लयमा छन् । उनी पुलिसलाई घातक बन्न सक्छन् । स्पिनर कुमार थपा र हरिशंकर शाह प्रदेश २ का हतियार हुन् । प्रदेश २ जित बिहिन छ । अन्तिम खेलमा पुलिसमाथि अप्रत्यासित जित निकाल्दै अन्त्य गर्न चाहान्छ ।