काठमाडौं (हाम्रो खेलकुद) – कर्णालीका युवा बाँया हाते ब्याट्सम्यान हेमन्त ओलीले चौथो संस्करणको प्रधानमन्त्री कप एकदिवसिय क्रिकेट प्रतियोगितामा नेपाल एपिएफ क्लबविरुद्ध अर्धशतक प्रहार गरेका छन् ।

हेमन्तले ८८ बलमा अर्धशतक पूरा गरेका हुन् । तीव्र गतिका बलर कमलसिंह ऐरीलाई चौका प्रहार गर्दै हेमन्तले अर्धशतक प्रहार गरेका थिए । २ सय १९ रनको विजयी लक्ष्य पछ्याएको कर्णालीले २९ ओभरमा ३ विकेट गुमाउँदै १ सय ८ रन बनाएको थियो ।

हेमन्त ९६ बलमा ६ चौका सहित ५७ रनमा अविजित छन् । उनलाई हिमान्शु शाहीले १४ रनमा साथ दिएका छन् । चौथो विकेटका लागि हेमन्त र हिमान्शुले ५४ रनको अविजित साझेदारी गर्दै कर्णालीलाई जितको आशा दिलाई रहेका छन् ।

तीव्र गतिका बलर किशोर महतोले दोस्रो ओभरको चौथो बलमा ओपनर विपिन रावललाई अमरसिंह राउटेलाबाट ७ रनमा क्याच गराउँदै पहिलो सफलता दिलाएका थिए । चौथो ओभरको दोस्रो बलमा महतोले निश्रल रावललाई २ रनमा विकेटकिपर सुबास खकुरेलबाट क्याच गराएका थिए ।

तेस्रो विकेटका रविन्द्रजंग शाहीले हेमन्त ओलीले ३४ रनको साझेदारी गर्दै इनिङलाई अघि बढाएका थिए । तर १५ औं ओभरको तेस्रो बलमा वसन्त रेग्मीले रविन्द्रलाई १४ रनमा बोल्ड आउट गरे । रविन्द्रले २७ बलमा २ चौका प्रहार गरे ।