काठमाडौं (हाम्रो खेलकुद) – कर्णाली प्रदेशका दक्षिण अफ्रिकी प्रशिक्षक पउल फरेरा अभ्यासको क्रममा घाइते हुन पुगेका छन् ।

काठमाडौंमा जारी प्रधानमन्त्री कप राष्ट्रिय एकदिवसिय क्रिकेट प्रतियोगितामा कर्णालीको लागि प्रशिक्षक समालि रहेका फरेरा बिहिबार नेपाल क्रिकेट स्कुल (एनसिएस) रातोपुलमा अभ्यासको क्रममा घाइते हुँदा उनको बाँया हातको काइली औंला (रिङ फिङ्गर) मा चोट लागेको थियो । त्यसैले फरेरा शुक्रबार कर्णालीले प्रदेश १ विरुद्ध टियु क्रिकेट मैदानमा खेल खेल्नेक्रममा थिएनन् ।

कर्णाली प्रदेश १ सँग ५९ रनले पराजित हुन पुग्यो । फरेरा दक्षिण अफ्रिका बी डिभिजन खेलेका खेलाडी हुन् । फरेरा बिहिबार देखिनै नख्खुमा रहेको नेपाल मेडिसिटी अस्पतालमा रहँदै आएका छन् । कर्णालीका कप्तान रविन्द्रंग शाहीका अनुसार उनको आइतबार औंलाको शल्यक्रिया (सर्जरी) हुनेछ ।

फरेराको प्रभाव कर्णालीका टोलीमा देखिन्छ । कर्णालीले यस प्रतियोगितामा प्रतिस्पर्धात्मक प्रर्दशन गर्दै प्रधानमन्त्री कपमा ऐतिहासिक पहिलो जित निकाल्दा उनको प्रभाव थियो । कर्णालीले गण्डकीलाई ५ विकेटले हराउँदै प्रधानमन्त्री कप इतिहासमा पहिलो जित निकालेको थियो । यस अघिका संस्करणमा भन्दा यस पटक कर्णालीका खेलाडी अब्बल देखिएका छन् । कर्णाली टोलीमा परिवर्तन देखिनुमा परेराको प्रभाव र भूमिका प्रमुख भएको रविन्द्र बताउँछन् ।

फरेरा दैलेखमा विगत तीन वर्षदेखि कफि खेति गर्दै आएका छन् । दोस्रो संस्करणको कर्णाली प्रिमियर लिगमा रविन्द्र शाही उत्कृष्ट ब्याट्सम्यान चुनिएका थिए । त्यसपछि फरेराले उनलाई सिकाउँदै आएका थिए । उनले कर्णालीलाई क्रिकेट विकासकै लागि निशुल्क प्रशिक्षण दिइरहेका छन् ।

कर्णालीले आफ्नो अन्तिम खेल शनिबार टियु मैदानमा सशस्त्र प्रहरी बल एपिएफसँग खेल्ने छ । सेमिफाइनलको झिनो सम्भावना कायम रहेको कर्णालीले एपिएफमाथि फराकिलो जित निकाल्नुपर्ने हुन्छ । उता एपिएफ अर्को खेलमा त्रिभुवन आर्मी क्लबसँग पनि फराकिलो हार बेहोरेको खण्डमा कर्णाली सबैलाई आश्चर्य पार्दै नेटरनरेटको आधारमा सेमिफाइनलमा पुग्न सक्ने अंकगणीतिय सम्भावना छ । सुरुवाती तीनै खेलमा जित निकालेको आर्मी सेमिफाइनलमा पुगि सकेको छ ।