एजेन्सी – वेस्टइन्डिजसँगको दोस्रो एक दिवसिय खेलमा घरेलु टोली बंगलादेशले ७ विकेटको सहज जित हात पारेको छ । योसँगै तीन ओडिआई खेलको सिरिज बंगलादेशले एक खेल अगावै २–० ले जितेको छ ।

जितको लागि १ सय ४९ रनको विजयी लक्ष्य पछ्याएको बंगलादेशले ३३.२ ओभरमा ३ विकेट गुमाउँदै १ सय ४९ रन पूरा गर्यो । बंगलादेशका कप्तान तमिम इकबालले ७६ बलमा ३ चौका र १ छक्का सहित ५० रनको योगदान दिए ।

सकीब अल हसन ५० बलमा ४ चौका सहित ४३ रनमा अविजित रहे । लिटन दास २२ र नज्मुल हसन सान्टो १७ रनमा आउट भए । वेस्टइन्डिजका अकिल हुसेन, जेसन मोहम्मद र रेमन राइफरले १–१ विकेट लिए ।

त्यसअघि ढाकामा टस जितेर पहिला ब्याटिङ थालेको वेस्टइन्डिज ४३.४ ओभरमा १ सय ४८ रनमा अल आउट भएको थियो । वेस्टइन्डिजका रोभमन पवेलले ६५ बलमा २ चौका र १ छक्का सहित सर्वाधिक ४१ रनको योगदान दिए ।

क्याजोर्न ओट्टलीले ४४ बलमा २ चौका र १ छक्का सहित २४ रनको योगदान दिए । अल्जारी जोशेफ १७, अलिक होसेन १२, नक्रमह बोनर २० र जेसन मोहम्मद ११ रनमा आउट भए ।

बंगलादेशका स्पिनर मेहेदी हसनले ९.४ ओभरमा २५ रन खर्चेर ४ विकेट लिए । मेहेदीनै खेलको म्यान अफ द म्याच चुनिए । सकीब अल हसन र मुस्ताफिजुर रहमानले २–२ विकेट लिए । पहिलो खेलमा बंगलादेश ६ विकेटले विजयी भएको थियो । तेस्रो तथा अन्तिम ओडिआई खेल सोमबार हुने छ ।