एजेन्सी – नेपाली लेगस्पिनर सन्दीप लामिछाने सम्मिलित होबार्ट हरिकेन्स बिग ब्यास लिग २०२०/२१ अन्तर्गत ४७ औं खेलमा पर्थ स्कोचर्ससँग २२ रनले पराजित भएको छ । जितका लागि १ सय ८० रनको विजयी लक्ष्य पछ्याएको होबार्टले २० ओभरमा ८ विकेट गुमाउँदै १ सय ५७ रन बनायो ।

होबार्टका डार्सी सर्टले ३७ बलमा ५ चौका सहित सर्वाधिक ४३ रनको योगदान दिए । पिटर ह्यान्डस्कोम्ब ३०, विल ज्याक्स २१, टिम डेभिड २७, नाथन इल्स ९ र म्याथ्यु वेड ६ रनमा आउट भए । पर्थका झेय रिचर्ड्सनले ४ ओभर ३३ रन खर्चेर ४ विकेट लिए । जेसन बेहरनडोर्फ २, एन्ड्रुय टाई र लियाम लिभिङस्टोनले १–१ विकेट लिए ।

त्यसअघि पर्थमा टस जितेर पहिला ब्याटिङ थालेको पर्थले २० ओभरमा ८ विकेट गुमाउँदै १ सय ७९ रन बनाएको थियो । पर्थका जोश इंगलिसले ३५ बलमा ४ चौका र २ छक्का सहित सर्वाधिक ५८ रनको योगदान दिए । जेसन रोय २०, लियाम लिभिङस्टोन २६, एस्टन टर्नर १५ र झेय रिचर्ड्सनले २९ रनको योगदान दिए । होबार्टका सन्दीप लामिछानेले ४ ओभरमा २७ रन खर्चेर २ विकेट लिए । नाथन इल्सले ४ ओभरमा ३४ रन खर्चेर ४ विकेट लिए ।

यस्तो रह्यो सन्दीपको चार ओभर

सन्दीपलाई होबार्टले छैटौं ओभरमा बलिङमा ल्याएको थियो । तर पहिलो बलमै लियाम लिभिङस्टोनले छक्का प्रहार गर्दै सन्दीपको सुरुवात गरेका थिए । सन्दीपले पहिलो बलमा छक्का खर्चिए पनि दोस्रो र तेस्रो बलमा एक एक रन खर्चिदै पूनरागमन गरेका थिए ।

चौथो बलमा ठूलो सट खेलेका लिभिङस्टोन डीप स्क्विायर लेगमा डेविड मलानबाट २६ रनमा क्याच गराउँदै सन्दीपले पछिल्ला दुई खेलमा बनेको विकेटविहिन खडेरी तोडे । पाँचौं बलमा मिचेल मार्श र छैटौं बलमा जोश इंगलिसलाई एक एक रन दिए ।

जोश र मिचेलले सन्दीपको आठौं ओभरको सुरुवाती तीन बलमा एक एक रन बटुलेका थिए । चौथो बल मार्शलाई डट राखे । पाँचौं बलमा सन्दीपले मार्शलाई ७ रनमा एलबिडब्लू आउट गरे । सन्दीपको गुगली बलमा मार्श एलबिडब्लूको धरापमा परेका थिए । अन्तिम बलमा एस्टन टर्नरले २ रन दिँदै आफ्नो दोस्रो ओभर सकेका थिए ।

११ औं ओभरको पहिलो बलमा जोश इंगलिसले दुई रन लिए । दोस्रो बलमा एक रन लिँदै स्ट्राइक टर्नरलाई दिए । अन्य तीन बलमा पनि सन्दीपले १–१ रन खर्चिए । १३ औं ओभरमा सन्दीपले टर्नरलाई सुरुवाती दुई बल डट राखेका थिए । तेस्रो बलमा कभरमा टर्नरले चौका प्रहार गरेका थिए । चौथो बल डट राख्दा पाँचौं र अन्तिम बलमा बलमा १–१ रन खर्चिदै अन्त्य गरे ।