काठमाडौं (हाम्रो खेलकुद) – चौथो संस्करणको प्रधानमन्त्री कप एकदिवसिय क्रिकेट प्रतियोगितामा प्रदेश २ ले बागमती प्रदेशलाई १ सय ८० रनको लक्ष्य दिएको छ ।

मुलपानी क्रिकेट मैदानमा टस जितेर पहिला ब्याटिङ थालेको प्रदेश दुई ४८.२ ओभरमा १ सय ७९ रनमा अल आउट भयो । प्रदेश २ का युवा अलराउन्डर बिवेक यादव अन्तिम विकेटका रुपमा रन आउट हुनुअघि ७४ बलमा ३ चौका र ३ छक्का सहित सर्वाधिक ६६ रनको योगदान दिए । बिवेकले ६७ बलमा जारी प्रतियोगितामा आफ्नो दोस्रो अर्धशतक पूरा गरेका थिए । बिवेकले लुम्बिनीविरुद्ध ५१ रनको अर्धशतकीय इनिङ खेलेका थिए ।

छैटौं ओभरको पहिलो बलमा गौतम केसीले हरिशंकर शाहलाई ६ रनमा एलबिडब्लू आउट गर्दै पहिलो सफलता दिलाएका थिए । सातौं ओभरको अन्तिम बलमा रामनरेश गिरीले रवि सिंहलाई शून्यमा एलबिडब्लू आउट गरे । १३ औं ओभरको पाँचौं बलमा विशाल शुश्लिङ ५ रनमा क्याच आउट भए । १४ औं ओभरको पहिलो बलमा सुधिर चौधरीलाई गौतमले १५ रनमा ईशान पान्डेबाट क्याच आउट गराए ।हिमान्शु दत्त शून्य, महबुब आलम २ र कप्तान सुरज कुर्मी १३ रनमा आउट हुँदा प्रदेश दुई २४.१ ओभरमा ६९–७ को अवस्थामा पुगेको थियो ।

आठौं विकेटका लागि बिवेक यादव र राहुल प्रताप सिंहले ५३ रनको साझेदारी गर्दै प्रदेश २ लाई मध्यम योगफलसम्म पुर्याएका थिए । ३९ औं ओभरको तेस्रो बलमा तिलकराज भण्डारीले राहुललाई १८ रनमा बोल्ड गर्दै साझेदारी तोडेका थिए । ६२ बल खेलेका उनले कुनैपनि बाउन्ड्री प्रहार गर्न सकेनन् । कुमार थापाले ३१ बलमा २ छक्का सहित २२ रनमा बनाउँदै आउट भए ।

तीव्र गतिका बलर गौतम केसीले १० ओभरमा १ मेडन सहित २९ रन खर्चेर ४ विकेट लिए । राम नरेश गिरीले १० ओभरमा ३ मेडन सहित ३५ रन खर्चेर २ विकेट लिए । विपिन आचार्य, नन्दन यादव र तिलकराज भण्डारीले १–१ विकेट लिए ।