एजेन्सी – नेपाली लेगस्पिनर सन्दीप लामिछानेले बिग ब्यास लिग २०२०/२१ अन्तर्गत ४७ औं खेलमा पर्थ स्कोचर्सविरुद्ध उत्कृष्ट प्रर्दशन गरेका छन् ।

सन्दीपले ४ ओभरमा २७ रन खर्चेर २ विकेट लिए । सुरुवात छक्का खर्चिदै गरेपनि त्यसपछि उत्कृष्ट प्रर्दशन गर्दै अन्त्य राम्रो गरेका छन् । सन्दीपलाई होबार्टले छैटौं ओभरमा बलिङमा ल्याएको थियो । तर पहिलो बलमै लियाम लिभिङस्टोनले छक्का प्रहार गर्दै सन्दीपको सुरुवात गरेका थिए । पहिलो बलमा छक्का खर्चिए पनि दोस्रो र तेस्रो बलमा एक एक रन खर्चिदै पूनरागमन गरेका थिए ।

चौथो बलमा ठूलो सट खेलेका लिभिङस्टोन डीप स्क्विायर लेगमा डेविड मलानबाट २६ रनमा क्याच गराउँदै पछिल्ला दुई खेलमा बनेको विकेटविहिन खडेरी तोडे । पाँचौं बलमा मिचेल मार्श र छैटौं बलमा जोश इंगलिसलाई एक एक रन दिए ।

जोश र मिचेलले सन्दीपको आठौं ओभरको सुरुवाती तीन बलमा एक एक रन बटुलेका थिए । चौथो बल मार्शलाई डट राखे । पाँचौं बलमा सन्दीपले मार्शलाई ७ रनमा एलबिडब्लू आउट गरे । सन्दीपको गुगली बलमा मार्श एलबिडब्लूको धरापमा परेका थिए । अन्तिम बलमा एस्टन टर्नरले २ रन दिँदै आफ्नो दोस्रो ओभर सकेका थिए ।

११ औं ओभरको पहिलो बलमा जोश इंगलिसले दुई रन लिए । दोस्रो बलमा एक रन लिँदै स्ट्राइक टर्नरलाई दिए । अन्य तीन बलमा पनि सन्दीपले १–१ रन खर्चिए । १३ औं ओभरमा सन्दीपले टर्नरलाई सुरुवाती दुई बल डट राखेका थिए । तेस्रो बलमा कभरमा टर्नरले चौका प्रहार गरेका थिए । चौथो बल डट राख्दा पाँचौं र अन्तिम बलमा बलमा १–१ रन खर्चिदै अन्त्य गरे ।

मेलबर्नमा टस जितेर पहिला ब्याटिङ गरि रहेको पर्थले १३ ओभरमा ४ विकेट गुमाउँदै १ सय ४ रन बनाएको छ ।