काठमाडौं (हाम्रो खेलकुद) – नेपाली राष्ट्रिय क्रिकेट टोलीका पूर्व कप्तान पारस खड्का, तीब्र गतिका बलर करण केसी र युवा अलराउन्डर कुशल मल्ल संयुक्त अरव इमिरेट्स (यूएई) मा हुने टि टेन लिगका लागि आज त्यसतर्फ लाग्ने भएका छन् ।

पारस, करण र कुशल बेलुका ७ बजे यूएईतर्फ लाग्ने छन् । अर्का तीब्र गतिका बलर सोमपाल कामी भने आज विहानैं यूएईतर्फ लागि सकेका छन् । सोमपाल मराठा अरेवियन्स, करण पुणे डेभिल्स र कुशल टिम आबूधाबी बाट टि टेन लिग खेल्ने छन् । पारस आबूधाबीमा इमर्जिङ ट्यालेन्ट मेन्टरको भूमिका निर्वाह गर्ने छन् ।

टि टेन जनवरी २८ देखि फेब्रुअरी ६ सम्म आबूधाबीमा चल्ने छ । काठमाडौंमा जारी प्रधानमन्त्री कप आर्मीका तीनै खेलाडी सोमपाल, करण र कुशलले खेलेनन् । पारसले भने बागमती प्रदेशबाट सुरुवाती दुई खेल खेलेका थिए । पारस पुलिसविरुद्ध १७ रनमा आउट भएका थिए । उक्त खेलमा बागमतीले पुलिसलाई ७ विकेटले हराएको थियो ।

बागमतीले सुदूरपश्चिमलाई १ सय ८० रनको फराकिलो अन्तरले हराउँदा पारस २० रनमा आउट भएका थिए । सुरुवाती दुई खेल खेल्न भ्याउने भएपनि आर्मीका तीनै खेलाडीले खेलेका थिएनन् । आर्मीका कप्तान विनोद भण्डारीले सुरुमा यी तीन खेलाडीलाई खेलाउँदा गएपछि आफूलाई गाह्रो हुने भएकोले कुनैपनि खेल नखलेको बताएका थिए ।

कुशलको बन्द प्रशिक्षणको क्रममा गत पुसमा बाँया हातको काँधमा चोट लागेको थियो । आफूपूर्ण रुपमा फिट भएको कुशलले जनाएका छन् ।