काठमाडौं (हाम्रो खेलकुद) – नेपाली राष्ट्रिय क्रिकेट टोलीका युवा अलराउन्डर पवन सरार्फले प्रधानमन्त्री कप राष्ट्रिय एकदिवसिय क्रिकेट प्रतियोगितामा १३ बलमै अर्धशतक प्रहार गर्दै कीर्तिमान बनाएका छन् ।

नेपाल पुलिस क्लबबाट पवनले लुम्बिनी प्रदेशविरुद्ध १३ बलमै अर्ध शतक प्रहार गर्दै नेपाली राष्ट्रिय क्रिकेटमा सर्वाधिक छिटो अर्धशतक बनाउने कीर्तिमान कायम गरेका छन् । पवनले विष्फोटक अन्त्य गर्दा टियु क्रिकेट मैदानमा टस हारेर पहिला ब्याटिङ थालेको पुलिसले ५० ओभरमा ४ विकेट गुमाउँदै ३ सय १० रन बनायो । पवन १३ बलमा ६ छक्का र १ चौका सहित ५० रनमा अविजित रहे ।

पवन ब्याटिङको लागि ४८ औं ओभरमा आएका थिए । ४८ औं ओभरको दोस्रो बलमा दीपेन्द्र सिंह ऐरी ८५ रनमा क्याच आउट भएपछि पवनलाई पुलिसले ब्याटिङको लागि मैदान पठाएको थियो । उक्त समय पुलिस २५४–४ को अवस्थामा थियो ।

सौरभ खनाललाई अन्तिम बलमा चौका प्रहार गरेका थिए । ४९ औं ओभरमा पवनले बिक्रम भुषाललाई तेस्रो र पाँचौं बलमा छक्का प्रहार गरेका थिए । अन्तिम बलमा एक रन लिँदै स्ट्राइक आफैंमा राखे । ४९ ओभरको समाप्तिमा पवन ७ बलमा २२ रनमा अविजित थिए । अन्तिम ओभरमा सौरभलाई सुरुवाती तीन ओभरमा लगातार तीन छक्का प्रहार गरे ।

चौथो बलमा ठूलो सट खेलेका पवनलाई डिप मिडविकेटमा देव खनालले ४० रनमा क्याच छोड्दै जीवनदान दिएका थिए । त्यसपछि दुई बलमा पवनले २–२ रन बटुले । अन्तिम बलमा एक्स्ट्रा कभरमा छक्का प्रहार गर्दै इनिङ अन्त्य गर्नुको साथैं १३ बलमा अर्धशतक प्रहार गरेका थिए ।