काठमाडौं (हाम्रो खेलकुद) – नेपाल पुलिस क्लबका ओपनर सुनिल धमलाले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा लुम्बिनीविरुद्ध शतक प्रहार गरेका छन् ।

धमलाले १ सय ४२ बलमा प्रधानमन्त्रीकप र राष्ट्रिय प्रतियोगितामा आफ्नो पहिलो शतक प्रहार गरेका हुन् । धमलाले ४३ औं ओभरको चौथो बलमा एक रन बटुल्दै पहिलो शतक प्रहार गरेका थिए । धमलाको यो करिअरको पनि पहिलो शतक हो ।

धमला १ सय ४३ बलमा ७ चौका र १ छक्का सहित १ सय १ रनमा खेलि रहेका छन् । धमलालाई दीपेन्द्रसिंह ऐरीले ४८ बलमा १ चौका र ३ छक्का सहित ५७ रनमा साथ दिएका छन् । जारी प्रतियोगिाताको यो दोस्रो शतक हो ।

यसअघि गण्डकीविरुद्ध आर्मीका कप्तान विनोद भण्डारीले १ सय ११ रनको शतकीय इनिङ खेलेका थिए । टियु क्रिकेट मैदानमा टस हारेर पहिला ब्याटिङ थालेको पुलिसले ४३ ओभरमा २ विकेट गुमाउँदै १ सय ९७ रन बनाएको छ ।

पुलिसका ओपनर कुशल भुर्तेललाई कप्तान कृष्ण कार्कीले सातौं ओभरको अन्तिम बलमा प्रनित थापा मगरबाट ६ रनमा क्याच गराउँदै पहिलो सफलता दिलाएका थिए । कुशल आउट हुँदा पुलिसले स्कोरबोर्डमा २७ रन जोडेको थियो ।

स्पिनर दिपेन्द्र रावतको २७ औं ओभरको दोस्रो बलमा अमित श्रेष्ठ मिडअनमा २८ रनमा समातिन पुगे । अमितले ४९ बलमा ३ चौका प्रहार गरे । बुधबार धमलाले सुदूरपश्चिमविरुद्ध ५३ रनको इनिङ खेलेका थिए । दोस्रो विकेटका लागि अमित र धमलो ५७ रनको साझेदारी गरेका थिए ।